ঘৰৰ গ্ৰীল ভাঙি থাকোতেই উত্তৰ গুৱাহাটী আৰক্ষীয়ে ধৰিলে দুজন গভাইত চোৰ

দীৰ্ঘদিনৰ পৰা সন্ত্ৰাস চলাই অহা চোৰৰ দল এটাৰ দুজন সদস্যক বুধবাৰে নিশা উত্তৰ গুৱাহাটী আৰক্ষীয়ে আটক কৰিবলৈ সক্ষম হয়। ৭ জনীয়া চোৰৰ এটা বৃহৎ গেঙে উত্তৰ গুৱাহাটীৰ ৰজাদুৱাৰত চোৰ কৰিবলৈ আহোতেই উত্তৰ গুৱাহাটী আৰক্ষীয়ে দলটোৰ সদস্য দুজনক আটক কৰে।

৭ জনীয়া দলৰ ৫ জনে পলাই যাবলৈ সক্ষম হয় যদিও আৰক্ষীয়ে আটক কৰে ছাদ্দাম হুছেইন আৰু ছহিদুল ওৰফে দুলুক। গৃহস্থৰ গ্ৰীল ভাঙি থাকোতেই হাতে লোটে ধৰা পৰা ধৃত ছাদ্দাম হুছেইন আৰু ছহিদুল হৈছে একো একোজন ছদ্মবেশী মিস্ত্ৰী। দিনত মিস্ত্ৰী, ফেৰিৱালা ৰাতি হ’লে গৃহস্থৰ ঘৰত চাফাই অভিযান চলাই বুলি আৰক্ষীয়ে জনায়।

নিশা উত্তৰ গুৱাহাটী আৰক্ষীৰ অভিযানত জালুকবাৰী কাটিয়া দলঙৰ পৰা আটক হোৱা ছহিদুল ওৰফে দুলু আৰু ছাদ্দাম উত্তৰ গুৱাহাটীৰ লগতে নামনি অসমৰ বিভিন্ন ঠাইত সংঘটিত চুৰিকাণ্ডৰ সৈতে জড়িত থকাৰ কথা দুয়োজনে আৰক্ষীৰ মাৰাথান জেৰাত স্বীকাৰ কৰে।

ইফালে আৰক্ষীৰ জেৰাত ছহিদুল আৰু ছাদ্দাম হুছেইনে ৭ জনীয়া চোৰৰ গেংটোৰ বাকী কেইজন সদস্যৰো নাম উল্লেখ কৰিছে। দলটোত থকা আন সদস্য সকল ক্ৰমে ভুট্টু ওৰফে আছকৰ (গৌৰীপুৰ), আব্দুল (গৌৰীপুৰ),ৰফিক ওৰফে মনোৱাৰ (হাট শিঙিমাৰী), জামাল (খাৰুপেটীয়া) আৰু মকবুল (জালুকবাৰী)।

বৰ্তমান চোৰৰ দলটোৰ বাকী ৫ জন সদস্যক বিচাৰি উত্তৰ গুৱাহাটী আৰক্ষীয়ে অভিযান তীব্ৰতৰ কৰি তোলা বুলি জানিব পৰা গৈছে।