নাগৰিকত্ব বিধেয়ক প্ৰসংগত মন্ত্ৰী প্ৰমীলাৰ মন্তব্য : বি টি চিৰ বাহিৰৰ লোকৰ বোজা লোৱা নহ’ব

নাগৰিকত্ব সংশোধনী বিধেয়কৰ জৰিয়তে হিন্দু বাংলাদেশীক ভাৰতৰ নাগৰিকত্ব প্ৰদান কৰিবলৈ ওলোৱা কাৰ্যৰ বিৰুদ্ধে বিজেপিৰ মিত্ৰ দল বি পি এফে একো মন্তব্য নকৰিলেও তেওঁলোকে অন্য লোকৰ বোজা গ্ৰহণ নকৰে বুলি স্পষ্ট ৰূপত প্ৰকাশ কৰি দিছে।

নাগৰিকত্ব সংশোধনী বিধেয়কক কেন্দ্ৰ কৰি বিজেপিয়ে গ্ৰহণ কৰা স্থিতিৰ বিৰুদ্ধাচৰণ কৰি অগপই মিত্ৰতা ত্যাগ কৰিলেও মিত্ৰজোঁটত থকা বি পি এফৰ নেত্ৰী প্ৰমীলাৰাণী ব্ৰহ্মই বি টি চিত বাহিৰা মানুহৰ বোজা গ্ৰহণ কৰা নহ’ব বুলি দৃঢ়তাৰে মন্তব্য কৰে।

বিধেয়কখনক লৈ বি পি এফ আৰু বিজেপিৰ মিত্ৰতাত কোনো ধৰণৰ বেমেজালিৰ সৃষ্টি হোৱা নাই যদিও বি পি এফ নেত্ৰী তথা মন্ত্ৰী প্ৰমীলাৰাণী ব্ৰহ্মই এক প্ৰকাৰ এই ক্ষেত্ৰত নিজৰ তথা দলৰ স্থিতি স্পষ্ট কৰি দিয়ে। তেওঁ কয় যে কোনো লোককে বি টি চিত জাপি দিব নোৱাৰিব। যদিহে কোনো লোকৰ বোজা আমাক জাপি দিয়া হয় তেন্তে ইয়াৰ বিৰুদ্ধে দৃঢ়তাৰে থিয় দিম।

উল্লেখ্য যে অসমবাসীক দিয়া প্ৰতিশ্ৰুতি ৰক্ষা কৰি বিজেপিৰে মিত্ৰতা ত্যাগ কৰা অগপ দলক ধন্যবাদ জ্ঞাপন কৰি নৰ্থ-ইষ্ট নাওৰ আগত ব্ৰহ্মই কয় ‘ৰাইজৰ আহ্বান অগপই শুনিলে। অসমৰ জনসাধাৰণৰ আহ্বানক সঁহাৰি জনাইছে অগপই। এটা আঞ্চলিকতাবাদী শক্তি হিচাপে অগপক অসমৰ ৰাইজে মনে-প্ৰাণে বিচাৰে। অসমৰ ৰাইজৰ স্বাৰ্থৰ হকে কাম কৰি অহা দল এটাৰ প্ৰয়োজন আছে বুলি মই ভাবো’।

বিজেপি মিত্ৰজোঁটৰ পৰা অগপ ওলাই অহাৰ পাছতে বিভিন্ন দল-সংগঠনে বি পি এফকো বিজেপিৰ পৰা ওলাই আহি বেলেগকৈ এখন চৰকাৰ গঠন কৰিবলৈ আহ্বান জনোৱা সন্দৰ্ভত ব্ৰহ্মই কয় যে বিজেপিৰে মিত্ৰতা সন্দৰ্ভত মই নহয় হাগ্ৰামা মহিলাৰীয়েহে সকলো কব পাৰিব।

উল্লেখ্য যে নাগৰিকত্ব সংশোধনী বিধেয়কৰ বাবে উত্তাল হৈ থকা ৰাজ্যৰ ৰাজনীতিত বি পি এফ নেত্ৰী তথা মন্ত্ৰী প্ৰমীলা ৰাণী ব্ৰহ্মৰ শেহতীয়া মন্তব্যই কেনে ধৰণৰ প্ৰভাৱ পেলায় সেয়া পৰৱৰ্তী সময়ত লক্ষ্যণীয় হ’ব।