ছয় জনগোষ্ঠীক জনজাতিকৰণৰ বিৰোধিতা : ১১ জানুৱাৰিত জনজাতি সংগঠনসমূহৰ ‘অসম বন্ধ’

ৰাজ্যৰ ছয় জনগোষ্ঠীক জনজাতিকৰণ কৰাৰ বাবে কেন্দ্ৰীয় চৰকাৰে গ্ৰহণ কৰা পদক্ষেপে বৰ্তমানৰ অনুসূচিত জনজাতিসকলৰ মৰ্যাদাত আঘাত হানিব বুলি শংকিত হৈ জনজাতি সংগঠনসমূহে এই কাৰ্যৰ বিৰুদ্ধাচৰণ হিচাপে অহা ১১ জানুৱাৰিত আহ্বান জনাইছে অসম বন্ধ।

জনজাতি সংগঠনসমূহৰ সমন্বয়ৰক্ষী সমিতিয়ে কেন্দ্ৰীয় চৰকাৰৰ সংবিধান (অনুসূচিত জনজাতি) সংশোধনী বিধেয়ক ২০১৯ৰ বিৰোধিতাত ১১ জানুৱাৰিৰ পুৱা ৫ বজাৰ পৰা ২৪ ঘণ্টীয়া অসম বন্ধৰ আহ্বান জনাইছে।

উল্লেখ্য যে প্ৰকৃত জনজাতিক বঞ্চনা কৰি ছয় জনগোষ্ঠীক জনজাতিকৰণ কৰিবলৈ ওলোৱাৰ উদ্দেশ্য ৰাজনৈতিক অভিসন্ধি বুলি আখ্যা দিয়াৰ লগতে বিজেপি নেতৃত্বাধীন চৰকাৰে অসমৰ প্ৰকৃত জনজাতিসকলক নিঃশেষ কৰাৰ যি ষড়যন্ত্ৰত লিপ্ত হৈছে তাৰ প্ৰতিবাদতে কাইলৈ অসম বন্ধ পালনৰ সিদ্ধান্ত গ্ৰহণ কৰিছে।

লোকসভা নিৰ্বাচনৰ আগে আগে বিজেপিয়ে ৰাজনৈতিক মুনাফা আদায়ৰ প্ৰচেষ্টাত ৰাজ্যৰ প্ৰকৃত জনজাতিসকলক সম্পূৰ্ণ অন্ধকাৰত ৰাখি লোৱা এই সিদ্ধান্ত কোনো কাৰণতেই মানি লোৱা নহ’ব বুলি স্পষ্টকৈ উল্লেখ কৰিছে সংগঠনসমূহৰ সমন্বয়ৰক্ষী সমিতিয়ে।

কেন্দ্ৰ আৰু ৰাজ্য চৰকাৰৰ এই সিদ্ধান্তৰ বিৰুদ্ধে সংগ্ৰাম চলাই যাব আৰু প্ৰয়োজন হ’লে উচ্চতম ন্যায়ালয়ৰ দ্বাৰস্থ হ’ব বুলিও জনজাতি সংগঠনসমূহৰ সমন্বয়ৰক্ষী সমিতিৰ মুখ্য আহ্বায়ক তথা ট্ৰাইবেল সংঘৰ সম্পাদক প্ৰধান আদিত্য খাখলাৰীয়ে জানিবলৈ দিয়ে।