৮৯ বছৰ বয়সত ভৰি দিলে কথাশিল্পী ইমাৰাণ শ্বাহে

আজি বিশিষ্ট সাহিত্যিক, অসম সাহিত্য সভাৰ প্ৰাক্তন সভাপতি তথা কথা শিল্পী ইমৰাণ শ্বাহৰ ৮৯ বছৰীয়া জন্মদিন। জীৱনৰ ৮৮ টা বসন্ত পাৰ কৰি আজি ৮৯ বছৰত ভৰি দিলে ইমৰাণ শ্বাহে। সাহিত্যিক গৰাকীক জন্মদিনৰ শুভেচ্ছা জনাবলৈ তেখেতৰ ধাইআলিস্থিত বাসগৃহত ভিৰ কৰেহি বিভিন্ন দল সংগঠনৰ লগতে অজস্ৰ গুণমুদ্ধই।

ইপিনে শিৱসাগৰ জিলা সাহিত্য সভাইও কথাশিল্পী গৰাকীৰ নিজা বাসগৃহত উদযাপন কৰে জন্মদিন। এই অনুষ্ঠানতেই বিশিষ্ট শিল্পীগৰাকীৰ নৱতম গ্ৰন্থ ‘উপকূল’ আৰু কবিতা সংকলন ‘আৰু কবিতা’ উন্মোচন কৰা হয়।

উল্লেখ্য যে ১৯৩৩ চনত শিৱসাগৰৰ ধাইআলিত জন্মগ্ৰহণ কৰা কথাশিল্পী গৰাকীয়ে নৱম শ্ৰেণীত পঢ়ি থাকোতেই বনবাসী নামৰ এখন কাব্য সংকলন প্ৰকাশ কৰি সাহিত্যজগতত ভুমুকি মাৰিছিল। তেতিয়াই পৰাই একেধাৰে বিভিন্ন গল্প, নিবন্ধ, কবিতা পুথি ৰচনা কৰি অসমীয়া সাহিত্যৰ ভড়াল চহকী কৰিছে। ঈষান দত্ত, অনামিকা বৰুৱা, অমিতাভ বৰুৱা আদি ছদ্ম নামেৰে বহু গল্প কবিতা লিখিছিল কথাশিল্পী গৰাকীয়ে।

সংগীতৰ সিপাৰে, জোনাকৰ ছবি, তানচেন, ইনমিতা, ক্ৰান্তিৰেখা, সাগৰিকা, জবানবন্দী, বন্ধ দুৱাৰ, মোৰ ফুলনিৰ ফুল, দৃষ্টি-সৃষ্টি, কুকুহা, বনিদী বিহংগম কান্দে, পিয়া মুখচন্দা পাথিক, দোকমোকালি আদিৰ দৰে বহু গ্ৰন্থ আৰু কবিতা পুথি লিখিছে।

উল্লেখ্য যে ২০২১ বৰ্ষত ভাৰত চৰকাৰে ইমৰাণ শ্বাহক পদ্মশ্ৰী উপাধিৰে সন্মানিত কৰিছিল। অৱশ্যে স্বাস্থ্য জনিত কাৰণত তেওঁ এই সন্মান গ্ৰহণ কৰিব পৰা নাছিল। ইয়াৰোপৰি ২০১২ চনৰ অসম সাহিত্য সভাত সভাপতিৰ পদ অলংকিত কৰাৰ লগতে বিশিষ্ট সাহিত্যিক গৰাকীয়ে অসম চৰকাৰে অসম উপত্যকা সাহিত্য বঁটা আৰু আজানপীৰ বঁটাৰে সন্মানিত কৰিছিল।

ওপজা দিনত কথাশিল্পী ইমৰাণ শ্বাহলৈ নৰ্থইষ্ট নাওৰ তৰফৰ পৰাও জনোৱা হ’ল আন্তৰিক শুভেচ্ছা। সক্ৰিয় হৈ থাকক তেওঁৰ কলম। দীৰ্ঘায়ু হওঁক তেওঁৰ জীৱন।