খিলঞ্জীয়াৰ ৰক্ষাকৱচ অবিহনে এন আৰ চিয়ে সংখ্যালঘু হোৱাৰ পৰা বচাব নোৱাৰে অসমীয়াক : উপমন্যু হাজৰিকা

এন আৰ চিয়ে অসমৰ খিলঞ্জীয়া লোকক সংখ্যালঘু হোৱাৰ পৰা বচাব নোৱাৰে। এই মন্তৱ্য উচ্চতম ন্যায়ালয়ৰ জ্যেষ্ঠ অধিবক্তা তথা প্ৰব্ৰজন বিৰোধী মঞ্চৰ আহ্বায়ক উপমন্যু হাজৰিকাৰ।

১৯৫১ চনক ভিত্তিবৰ্ষ হিচাপে লৈ চৰকাৰী চাকৰি, সা-সুবিধা সংৰক্ষণৰ ৰক্ষাকৱচ প্ৰদানৰ বাবে দাবীত ৰাইজক সজাগ কৰিবলৈ জ্যেষ্ঠ অধিবক্তা উপমন্যু হাজৰিকাই উজনি অসমৰ ডিগবৈ, তিনিচুকীয়া আদি বিভিন্ন ঠাইত সভা আয়োজন কৰি এই বাস্তৱ দিশটোৰ কথা উল্লেখ কৰে।

তেওঁ কয়, ‘‘নাগৰিকত্ব সংশোধনী বিধেয়ক বাতিল কৰিব লাগিব। এই বিধেয়কে অসম তথা অসমীয়াৰ প্ৰতি ভাবুকি কঢ়িয়াই আনিব। কেৱল এন আৰ চিয়ে সংখ্যালঘু হোৱাৰ পৰা বচাব নোৱাৰে, তাৰ বাবে লাগিব ৰক্ষাকৱচ।’’

তেওঁ লগতে ন্যায্যপ্ৰাপ্তিৰ বাবে, অসম তথা অসমীয়াৰ অস্তিত্ব ৰক্ষাৰ বাবে ন্যায়িক দিশেৰেও অগ্ৰসৰ হ’ব লাগিব বুলি সদৰী কৰে। অসমৰ সমস্যা সমাধানৰ বাবে আন্দোলন-প্ৰতিবাদ কৰা দল-সংগঠনে আইনী প্ৰক্ৰিয়াৰে যুঁজ চলাই সমস্যা সমাধানৰ প্ৰচেষ্টা হাতত লোৱাৰ ওপৰতো হাজৰিকাই গুৰুত্ব আৰোপ কৰে।

উচ্চতম ন্যায়ালয়ৰ জ্যেষ্ঠ অধিবক্তাজনে ভূমিনীতি আৰু ভূমি আইনৰ দ্বাৰাহে খিলঞ্জীয়াক সংখ্যালঘু হোৱাৰ পৰা বচাব পৰা যাব বুলি মন্তব্য কৰে।

হাজৰিকাই লগতে লগতে  ৰাজনৈতিক প্ৰক্ৰিয়াৰে সমস্যা সমাধানত অসমৰ জনপ্ৰতিনিধিসকল মুঠেও সচেষ্ট নহয় বুলি উল্লেখ কৰি ৰাজনৈতিকভাৱেও সবল ভূমিকা পালন কৰি কেৱল অসম তথা অসমীয়াৰ অস্তিত্ব ৰক্ষাৰ বাবে জনপ্ৰতিনিধিসকলে কাৰ্য পদক্ষেপ হাতত ল’ব পাৰে বুলি মন্তব্য কৰে।

‘অসম তথা অসমীয়াক সংখ্যালঘু হোৱাৰ পৰা বচাবলৈ ১৯৫১ চনক ভিত্তিবৰ্ষ হিচাপে লৈ সংৰক্ষণৰ ৰক্ষাকৱচ’ বিষয়টোৰ সন্দৰ্ভত উচ্চতম ন্যায়ালয়ৰ জ্যেষ্ঠ অধিবক্তা তথা প্ৰব্ৰজন বিৰোধী মঞ্চৰ আহ্বায়ক উপমন্যু হাজৰিকাই ৰাজ্যৰ বিভিন্ন স্থানত জনসজাগতা অভিযান চলাই আছে।