১৯ লাখ বা ৪০ লাখৰ কথা নহয়, NRC ভৱিষ্যতৰ দলিল : মুখ্য ন্যায়াধীশ ৰঞ্জন গগৈ

ৰাষ্ট্ৰীয় নাগৰিক পঞ্জী (NRC)ক “ভৱিষ্যতৰ দলিল” আখ্যা দিছে দেশৰ মুখ্য ন্যায়াধীশ ৰঞ্জন গগৈয়ে। তেওঁ লগতে কয় যে অসমত অবৈধ প্ৰবজনকাৰীক চিনাক্ত কৰাটো “অত্যন্ত জৰুৰী” হৈ পৰিছে।

গগৈৰ মতে নাগৰিক পঞ্জী “এইটো মূহুৰ্তৰ দলিল নহয়। ১৯ লাখ বা ৪০ লাখৰ কথা নহয়। এইয়া ভৱিষ্যতৰ বাবে এখন বুনিয়াদী দলিল।“

দেওবাৰে নতুন দিল্লীত সাংবাদিক মৃণাল তালুকদাৰৰ প’ষ্ট কলনিয়েল আছাম (১৯৪৭ টু ২০১৯) “Post Colonial Assam (1947 to 2019)” শীৰ্ষক কিতাপখনৰ উদ্ধোধনী অনুষ্ঠানৰ ভাষণত গগৈয়ে এইদৰে কয়।

ভাষণত তেওঁ “অসমত NRC কোনো নতুন বা অভিনৱ কথা নহয়” বুলি উল্লেখ কৰি ই কেৱল ১৯৫১ চনৰ NRC তালিকা উন্নিত কৰাৰ এক প্ৰয়াস বুলি মন্তব্য কৰে।

“বৰ্তমানৰ NRC হৈছে ১৯৫১ চনৰ নাগৰিক পঞ্জীক উন্নিত কৰাৰ এক প্ৰয়াস। বেছিও নহয় কমও নহয়।“ তেওঁ লগতে কয়।

আনহাতে ভিত্তিবৰ্ষৰ তাৰিখকলৈ আপত্তি কৰি থকা তথা NRCক লৈ প্ৰশ্ন তোলা সকলক “armchair commentators” বুলি উল্লেখ কৰি তেওঁ কয়, “যিসকলে ভিত্তিবৰ্ষৰ তাৰিখকলৈ আপত্তি উঠাইছে তেওঁলোকে জুইৰ সৈতে খেলা কৰিছে। নতুন ঘা বা কুট প্ৰশ্নৰ বাবে ইয়াত কোনো স্থান নাই।“

উল্লেখযোগ্য যে অহা ১৭ নবেম্বৰত অৱসৰ গ্ৰহণ কৰিবলগীয়া ৰঞ্জন গগৈয়ে NRC প্ৰক্ৰিয়া নিৰীক্ষণৰ বাবে গঠিত উচ্চতম ন্যায়ালয়ৰ বিশেষ পীঠৰ অধ্যক্ষতা কৰিছিল।

যোৱা ৩১ আগষ্টত প্ৰকাশ পোৱা নাগৰিক পঞ্জীৰ চূড়ান্ত তালিকাৰ পৰা ৰাজ্যৰ ১৯ লাখ ব্যক্তিৰ নাম বাদ পৰিছিল।