এন আৰ চি: ‘বিতাড়ন’, ‘আটককৰণ’ এটাও নহয় বিদেশীৰ, মন্তব্য হিমন্ত বিশ্ব শৰ্মাৰ

আন্তঃৰাষ্ট্ৰীয় সংবাদ সংস্থা স্পুতনিক নিউজ-ৰ সৈতে শেহতীয়া সাক্ষাৎকাৰত মন্ত্ৰী হিমন্ত বিশ্ব শৰ্মাই চূড়ান্ত এন আৰ চিৰ পৰা বাদ পৰা লোকসকলকৰ “বিতাড়ন” বা “আটককৰণ” সন্দৰ্ভত অনিশ্চয়তা প্ৰকাশ কৰিছে।

“মানুহ (বিদেশী)ক এখন ৰে’লত তুলি সীমান্তলৈ পঠোৱা”সদৃশ পৰিস্থিতি এটাৰ সম্ভাৱনা “দেখা নাই” বুলি উল্লেখ কৰি এই মন্তব্য কৰিছে শৰ্মাই।

“ভাৰত এনে এখন দেশ যি শৰণাৰ্থীক সদায় আশ্ৰয় প্ৰদান কৰি আহিছে, সদায় সুনিশ্চিত কৰিছে মানৱ অধিকাৰ, মানুহৰ মৰ্য্যাদা। মই এটা পৰিস্থিতি দেখা নাই য’ত মানুহক ৰে’ল এখনত ভৰোৱা হ’ব আৰু সীমান্তলৈ পঠিওৱা হ’ব (বাংলাদেশ বা নেপাললৈ বিতাড়ন),” শৰ্মাৰ মন্তব্য।

বিতাড়ন বা আটককৰণ কৰা নহ’লে তেন্তে কি কৰা হ’ব এন আৰ চিত ঘোষিত বিদেশীসকলৰ? সেই সন্দৰ্ভত তেওঁ দেখা সম্ভাৱনা সাক্ষাৎকাৰটোত সদৰী কৰিছে শৰ্মাই।

লগতে পঢ়ক– আলফাৰ অস্ত্ৰৰ জবাব ‘শক্তিৰে’ দিব ৰাষ্ট্ৰই, আন্তঃৰাষ্ট্ৰীয় সংবাদ সংস্থাত মন্তব্য হিমন্ত বিশ্বৰ

“সম্ভৱতঃ সৃষ্টি হ’ব এনে এক শ্ৰেণীৰ নাগৰিক যাৰ হয়তো কিছুমান অধিকাৰ নাথাকিব; তেওঁলোকৰ ৰাজনৈতিক অধিকাৰ নাথাকিব পাৰে, তেওঁলোকৰ নাথাকিব পাৰে ভূমিৰ অধিকাৰ যিটো দেশৰ বহু অংশত বৰ্তমান আছেই। মই ভাবো কি হ’ব সেইটো নিৰ্ভৰ কৰিব সংখ্যাটোৰ ওপৰত। সেয়ে এইটো অনুমান কৰাটো খুব কঠিন,” এয়া শৰ্মাই দেখা এন আৰ চি পৰৱৰ্তী সময়ৰ “সম্ভাৱনা”।

কিন্তু এন আৰ চিত নাম নহাসকলৰ, তেওঁৰ মতে, ‘‘মানৱীয় মৰ্য্যাদা, মানৱ অধিকাৰ আৰু মৌলিক অধিকাৰ” নিশ্চিত কৰা হ’ব।

শৰ্মাই লগতে কয় অহা সাধাৰণ নিৰ্বাচন বা এই বিত্তীয় বৰ্ষ (৩১ মাৰ্চলৈকে)ৰ ভিতৰতে এন আৰ চি সম্পূৰ্ণ হোৱাৰ আশা কৰা হৈছে। কিন্তু এন আৰ চিৰ আধাৰত ভোটাৰ তালিকা সংশোধনৰ দৰে বিষয়ত অধিক সময় লাগিব বুলি কয় মন্ত্ৰীগৰাকীয়ে।

তেওঁ কয়, “এন আৰ চিৰ আধাৰত আমাৰ ভোটাৰ তালিকা সংশোধন কৰাৰ দৰে ব্যৱস্থা লোৱা হ’বনে নাই—সেইটো এটা নীতিগত সিদ্ধান্ত আৰু মই ভাবো ই আৰু কিছু সময় ল’ব।”