আলফাৰ অস্ত্ৰৰ জবাব ‘শক্তিৰে’ দিব ৰাষ্ট্ৰই, আন্তঃৰাষ্ট্ৰীয় সংবাদ সংস্থাত মন্তব্য হিমন্ত বিশ্বৰ

নাগৰিকত্ব বিধেয়কৰ বিৰুদ্ধে হুংকাৰ দি অহা আলফা (পঢ়ক আলফা-স্বাধীন)ই ‘অস্ত্ৰ’ প্ৰদৰ্শন কৰিলে তাক ‘শক্তিৰে’ মোকাবিলা কৰিব ৰাষ্ট্ৰই। এই মন্তব্য অসমৰ প্ৰভাৱশালী মন্ত্ৰী হিমন্ত বিশ্ব শৰ্মাৰ।

“এখন গণতান্ত্ৰিক চৰকাৰ আলফাৰ নিচিনা সংগঠনৰ শ্ৰুতলিপি মতে নচলে।… তেওঁলোকক শুনিবলৈ চৰকাৰ বাধ্য নহয়। আলফাই যি কৰে, তাৰ মোকাবিলা শক্তিৰে কৰা হ’ব।… তেওঁলোকে যদি অস্ত্ৰৰ শক্তি দেখুৱাব খোজে, তেন্তে ৰাষ্ট্ৰও তেওঁলোকক প্ৰত্যুত্তৰ দিয়াৰ বাবে মুক্ত,” মস্ক’ত মুখ্য কাৰ্য্যালয় থকা আন্তঃৰাষ্ট্ৰীয় সংবাদ গোষ্ঠী স্পুতনিকনিউজ-ত শেহতীয়া এক সাক্ষাৎকাৰত এই মন্তব্য শৰ্মাৰ।

বিধেয়কখনৰ বিৰুদ্ধে সৰৱ হৈ অহা আলোচনাপন্থী (পঢ়ক আলোচনাৰত) আলফা সন্দৰ্ভতো সাক্ষাৎকাৰটোত মন্তব্য কৰিছে মন্ত্ৰীজনে। আগন্তুক নিৰ্বাচনত শাসনাধীন বিজেপিক ভোট নিদিয়াৰ ইংগিত দি অহা আলোচনাৰত আলফাৰ “সমৰ্থন বা বিৰোধিতাৰ কোনো মূল্য নাই”, দাবী মন্ত্ৰীজনৰ। শৰ্মাই কয়, “আলোচনাৰত আলফাৰ দুটা বা তিনিটা ভোটে কোন জিকিব বা হাৰিব নিৰ্ধাৰণ নকৰে।”

লগতে পঢ়ক– দুৰ্ধৰ্ষ দৃষ্টি ৰাজখোৱাৰ নেতৃত্বত বাংলাদেশত আজিও সক্ৰিয় আলফা (স্বাঃ)

যোৱা নিৰ্বাচনত বিজেপিক ভোট “দিছিল”, কিন্তু এইবাৰ “নিদিয়ে” বুলি আলোচনাৰত আলফাই কৰা মন্তব্য সন্দৰ্ভত সাক্ষাৎকাৰী সাংবাদিকৰ প্ৰশ্নৰ উত্তৰত মন্ত্ৰী শৰ্মাই ইয়াক অভিহিত কৰিছে “দৰদাম”ৰূপে।

“নাগৰিক হিচাপে তেওঁলোকে যদি বিজেপিক ভোট দিছিল, ঠিক আছে! কিন্তু বাঙালী হিন্দু শৰণাৰ্থীকে ধৰি আন বহুতেওটো বিজেপিক ভোট দিছিল। কিন্তু আপুনি চৰকাৰৰ সৈতে দৰ-দাম কৰিব নোৱাৰে যে, ‘চাওক আমি ভোট দিছিলো’,” শৰ্মাৰ মন্তব্য।

শেহতীয়াকৈ অসমৰ বহু যুৱক-যুৱতীয়ে আলফাত যোগদান কৰাৰ কথাও অগ্ৰাহ্য কৰিছে মন্ত্ৰীজনে। শৰ্মাই এই দাবীক চৰকাৰক ‘ব্লেকমে’ইলিং’ৰ এক পদ্ধতিৰূপে অভিহিত কৰিছে।

লগতে পঢ়ক– আলফা (স্বাঃ)ক নাগৰিকত্ব বিধেয়কে ‘নতুন জীৱন দান’ কৰিছে: পল্লৱ ভট্টাচাৰ্য্য

“আপোনালোকে যদি নাগৰিকত্ব বিধেয়ক গৃহীত কৰে, তেন্তে আলফা শক্তিশালী হৈ যাব, এইটো চৰকাৰৰ সৈতে একধৰণৰ ব্লেকমে’ইলিং। কোনোবাই যদি আলফাত যদি যোগ দিয়ে তেওঁলোকক কঠোৰভাৱে মোকাবিলা কৰা হ’ব, কাৰণ কোনো বিধেয়ক বা নীতিগত বিষয়ত আপুনি ৰেহাই দিব নোৱাৰে বা আপুনি ভাৰতৰ সাৰ্বভৌমত্বক প্ৰত্যাহ্বান জনাব নোৱাৰে,” চৰকাৰৰ সৈতে “এইটো দৰদামৰ বিষয়” নহয় বুলি দাবী কৰি এই মন্তব্য শৰ্মাৰ।

লগতে পঢ়ক– এনডিএফবি-ত যোগদানৰ মুকলি আহ্বান বড়ো বিদ্ৰোহী নেতাৰ

আলফাক বাহিৰত ৰাখি বিধেয়কৰ সমৰ্থন আৰু বিৰোধিতাৰে অসমত দুটা “মত” থকাটো স্বীকাৰ কৰি শৰ্মাই কয় এই সন্দৰ্ভত সিদ্ধান্ত যুটীয়া সংসদীয় সমিতিয়ে ল’ব। “মই নিশ্চিত অসমৰ ৰাইজৰ মত যুটীয়া সংসদীয় সমিতিৰ চূড়ান্ত পৰামৰ্শত প্ৰতিফলিত হ’ব। তাৰ পিছত সংসদে যি সিদ্ধান্ত লয়, তেওঁলোকৰ কথা, কাৰণ ৰাজ্যৰ নাগৰিকত্বৰ বিষয়ত নিয়ন্ত্ৰণ নাই,” মন্তব্য শৰ্মাৰ।