ৰাছিয়াৰ সেনাবাহিনীত কৰ্মৰত ভাৰতীয়ৰ সংখ্যা ২৭ জনৰ পৰা ৪৪ জনলৈ বৃদ্ধি!

বৈদেশিক পৰিক্ৰমা মন্ত্ৰালয়ে শুকুৰবাৰে (৭ নৱেম্বৰ, ২০২৫) প্ৰকাশ কৰা অনুসৰি ৰাছিয়াৰ সেনাবাহিনীত কৰ্মৰত ভাৰতীয়ৰ সংখ্যা ছেপ্টেম্বৰ মাহৰ ২৭ জনৰ পৰা ৪৫ জনলৈ বৃদ্ধি পাইছে (কিছু সূত্ৰৰ মতে ৪৪ জন)।

খবৰ অনুসৰি, নতুন দিল্লীয়ে মস্কোক ভাৰতীয়সকলক এৰি দিবলৈ আৰু ভাৰতীয় নাগৰিকৰ নিযুক্তি প্ৰক্ৰিয়া বন্ধ কৰিবলৈ পুনৰ আহ্বান জনাইছে।

সাপ্তাহিক সংবাদ মাধ্যমৰ ব্রিফিঙৰ সময়ত মন্ত্ৰ্যালয়ৰ মুখপাত্ৰ ৰণধীৰ জয়ছৱালে নিশ্চিত কৰে যে যোৱা কেইমাহমানত ৰাছিয়াৰ সামৰিক শাখাই কেইবাজনো ভাৰতীয়ক নিযুক্তি দিছে।

ৰণধীৰ জয়ছৱালে উল্লেখ কৰে যে চৰকাৰে ৰাছিয়ান সামৰিক বাহিনীত জড়িতসকলৰ লগতে তেওঁলোকৰ পৰিয়ালৰ সংস্পৰ্শত আছে।

ৰাছিয়াৰ সেনাবাহিনীত যোগদান নকৰাৰ বাবে চৰকাৰে দিয়া পৰামৰ্শ পুনৰবাৰ উল্লেখ কৰি জয়ছৱালে কয় যে এনে নিযুক্তি জীৱনৰ বাবে বিপদজনক (fraught with danger to life)।

জয়ছোৱালে আৰু কয় যে ভাৰতীয় আইন প্ৰয়োগকাৰী সংস্থাসমূহে এনে নিযুক্তিৰ সৈতে জড়িতসকলৰ বিৰুদ্ধে ব্যৱস্থা গ্ৰহণ কৰি আছে যাতে মানুহ এনে বিপদজনক কামত প্ৰলোভিত নহয়।

উল্লেখযোগ্য যে ভাৰতে বাৰে বাৰে মস্কোৰ আগত এই বিষয়টো উত্থাপন কৰি আহিছে। এই বিষয়টো বিগত বছৰ (২০২৪ চনত) ৰাছিয়া ভ্ৰমণৰ সময়তো উত্থাপন কৰিছিল প্ৰধানমন্ত্ৰী নৰেন্দ্ৰ মোদীয়ে।

তাৰ পিছত বৈদেশিক সচিব বিনয় কোৱাট্ৰাই কৈছিল যে প্ৰধানমন্ত্ৰীয়ে ৰাছিয়াৰ বিষয়াসকলৰ আগত এই বিষয়টো শক্তিশালীভাৱে উত্থাপন কৰিছে আৰু ৰাছিয়াই সামৰিক বাহিনীত কৰ্মৰত সকলো ভাৰতীয় নাগৰিকক অতি সোনকালে মুকলি কৰি দিয়াৰ প্ৰতিশ্ৰুতি দিছে।

চৰকাৰী তথ্য অনুসৰি, মুঠ ১৭০ জনৰো অধিক ভাৰতীয় নাগৰিকক ৰাছিয়াৰ সশস্ত্ৰ বাহিনীত নিযুক্তি দিয়া হৈছে। ইয়াৰে ৯৬ জনক ডিচচাৰ্জ দিয়া হৈছিল, ১২ জনৰ যুদ্ধত মৃত্যু হোৱা বুলি জনা গৈছিল আৰু ১৬ জনক নিৰুদ্দিষ্ট হিচাপে তালিকাভুক্ত কৰা হৈছে।