বিশ্বনাথত ধুমুহাত ঘৰ ভাঙি কৰুণ মৃত্যুক সাৱটিলে এজন লোকে

ৰাজ্যৰ বিভিন্ন স্থানত এতিয়া ধুমুহাই কালান্তক ৰূপ ধাৰণ কৰিছে। এনে সময়তে শেহতীয়াকৈ বিশ্বনাথত অহা বতাহ ধুমুহাৰ ফলত বিস্তৰ ক্ষতি সাধন হয় বিশ্বনাথৰ বিভিন্ন অঞ্চলত।

ধুমুহাই বহু লোকৰ ঘৰৰ টিং পাত বতাহে উৰুৱাই নিয়াৰ উপৰি বিশ্বনাথ নগৰৰ বহু ব্যৱসায়িক  প্ৰতিষ্ঠানৰ চাইন বৰ্ড,হৰ্ডিং উৰুৱাই  নিয়ে।

বিশ্বনাথ নগৰ অঞ্চলত এই বতাহ ধুমুহাই বিস্তৰ ক্ষতি সাধন কৰাৰ লগতে বিশ্বনাথৰ অসম অৰুণাচল সীমান্তত  ধুমুহাই প্ৰাণ পৰ্যন্ত কাঢ়ি লৈ যায় এজন দৰিদ্ৰ লোকৰ প্ৰাণ।

বিশ্বনাথৰ অসম অৰুণাচল সীমান্তৰ বালিচাং পঞ্চায়তৰ অন্তৰ্গত ভাউৰা গুৰি গাওঁৰ সৰ্বেশ্বৰ বসুমতাৰী (৭১)নামৰ এজন লোকক  ধুমুহাত ঘৰ ভাঙি হেঁচি ধৰা ফলত  অকাল মৃত্যুক সাবটি ল’বলগীয়া হয় ।

আনহাতে বতাহ ধুমুহাৰ ফলত সৰ্বেশ্বৰ বসুমতাৰী নামৰ লোকজনৰ মৃত্যুৰ বাতৰি পাই উক্ত স্থানত উপস্হিত হয় বিশ্বনাথ সমষ্টিৰ বিধায়ক তথা বিশ্বনাথ সমষ্টিৰ বিজেপি দলৰ প্ৰাৰ্থী প্ৰমোদ বৰঠাকুৰ।

বৰঠাকুৰে মৃত লোকজনৰ ঘৰত উপস্হিত হৈ  পৰিস্থিতিৰ বুজ লৈ মৃত লোকজনৰ পৰিয়ালক জিলা প্ৰশাসনে উচিত ক্ষতি পূৰণ দিয়াৰ আহ্বান জনায়।