কাজিৰঙাৰ বনকৰ্মীৰ শিৱিৰৰ পৰা গুলী, টকা-পইচা লৈ উধাও হোৱা চোৰক আটক

৪ ডিচেম্বৰৰ নিশা কাজিৰঙা ৰাষ্ট্ৰীয় উদ্যানৰ পাণবাৰী সংৰক্ষিত বনাঞ্চলৰ মদাৰজুৰি বন শিৱিৰত এটা চোৰৰ দলে প্ৰৱেশ কৰি বিভিন্ন সা-সামগ্ৰীৰ লগতে ৮ ৰাউণ্ড সক্ৰিয় গুলী চুৰি কৰি নিয়া দলটোৰ এজন সদস্যক আজি পুৱা বন কৰ্মীয়ে আটক কৰে। চোৰজনৰ পৰা চুৰি কৰি নিয়া সামগ্ৰী সমূহো উদ্ধাৰ কৰিবলৈ সক্ষম হয়।

উল্লেখ্য যে মঙলবাৰে নিশা বন শিৱিৰত হোৱা চুৰি কাৰ্যৰ পাছতে অভিযান তীব্ৰতৰ কৰি তোলা বনকৰ্মীৰ এটা দলে আজি পুৱা মদাৰজুৰি বন শিৱিৰৰ ওচৰৰে বৰজুৰি বস্তিৰ হৰেণ চোৰেণ নামৰ কুখ্যাত চোৰটোক কৰায়ত্ব কৰাৰ লগতে চোৰটোৰ বাসগৃহৰ পৰা অন্যান্য সামগ্ৰীৰ লগতে গুলীখিনিও উদ্ধাৰ কৰে।

ইয়াৰ উপৰি চোৰজনৰ বাসগৃহৰ পৰা অভিযানকাৰী দলে বিভিন্ন স্থানৰ পৰা চুৰি কৰি অনা আন আন বহু মূল্যৱান সামগ্ৰীও উদ্ধাৰ কৰে৷ স্থানীয় লোকৰ মতে বহু চুৰি কাৰ্যৰ লগত জড়িত হৰেণ চোৰেণ এজন গভাইত চোৰ।

ইতিমধ্যে গভাইত চোৰ হৰেণ চোৰেণক বন কৰ্মীৰ দলটোৱে বোকাখাত আৰক্ষীক চমজাই দিছে। বন শিৱিৰৰ চুৰি কাৰ্যত হৰেণৰ লগত আৰু কোনো লোক জড়িত আছে নেকি সেই সন্দৰ্ভত অধিক তথ্য সংগ্ৰহৰ বাবে আৰক্ষীয়ে বৰ্তমান চোৰজনক জেৰা চলাই থকা বুলি জানিব পৰা গৈছে।