হাউলীত ৰৈ থকা ট্ৰাকত বাইকেৰে খুন্দা মাৰি থিতাতে মৃত্যু জিমৰ প্ৰশিক্ষকৰ; এৰি গ’ল আঠ মাহৰ অন্তঃসত্ত্বা পত্নীক

বৰপেটাৰ হাউলীৰ ইটাৰভিটাৰ কাজিৰঙা ধাবাৰ সমীপৰ ৩১ নং ৰাষ্ট্ৰীয় ঘইপত শনিবাৰে নিশা সংঘটিত এক পথ দুৰ্ঘটনাত এজন যুৱকৰ থিতাতে নিহত হয়। নিহত যুৱকজন হাউলীৰ এটা জিমৰ শিক্ষক তথা খান্দাৰপাৰ গাঁৱৰ নুৰুল ইছলামৰ পুত্র ইদ্ৰীছ আলী(২৬) বুলি জানিব পৰা গৈছে।

ঘটনাৰ বিৱৰণি মতে আলীয়ে শনিবাৰে নিশা নিজ গৃহৰ পৰা এ এছ ১৫ কে ১৩৯১ নম্বৰৰ আপাচি বাইকেৰে ইটাৰভিটাত চলি থকা এখল বাৰ্ষিক অধিৱেশন উপভোগ কৰিবলৈ গৈছিল। তেনে অৱস্থাতে ৩১ নং ৰাষ্ট্ৰীয় ঘাইপথৰ কাষত ৰৈ থকা এইচ আৰ ৩৮ এক্স ২৭৭৮ নম্বৰৰ এখন ট্ৰেইলৰত খুন্দা মাৰে। ফলত থিতাতে নিহত হয় যুৱকজন।

পিছত ঘটনাস্থলীত আৰক্ষী উপস্থিত হৈ যুৱকজনৰ মৃতদেহ উদ্ধাৰ কৰাৰ লগতে দুৰ্ঘটনাত জড়িত ট্ৰাকখনো জব্দ কৰে।

প্ৰায় ডেৰ বছৰ পূৰ্বে বিবাহ পাশত আবদ্ধ হৈ আঠ মাহৰ অন্তঃসত্ত্বা পত্নীক এৰি থৈ অকালতে প্ৰাণ হেৰুৱা যুৱকজনৰ মৃত্যুত পৰিয়ালৰ লোকসকল শোকত ভাগি পৰাৰ লগতে সমগ্ৰ অঞ্চল জুৰি এক শোকাকুল পৰিৱেশৰ সৃষ্টি হয়।