অৱশেষত মুখ খুলিলে ONGCএ! ভটিয়াপাৰৰ গেছ লিকেজ নিয়ন্ত্ৰণত থকাৰ দাবী

শিৱসাগৰ জিলাৰ ভটিয়াপাৰস্থিত RDS-147 ৰীগৰ পৰা যোৱা ১২ জুনৰ পৰা অবিৰতভাৱে গেছ নিৰ্গমন হৈ আছে। এই ঘটনাৰ প্ৰেক্ষাপটত ONGC-ৰ বিষয়া-কৰ্মচাৰীসকলে বনগাঁও হাইস্কুলত স্থাপন কৰা অস্থায়ী সাহায্য শিবিৰত এখন সংবাদমেলৰ আয়োজন কৰে।

ONGC অসম এচেটৰ কাৰ্যবাহী সঞ্চালক ভাস্কৰ চৌধুৰীয়ে সংবাদমেলত কয়— “আমাৰ দলে গেছ নিৰ্গমন বন্ধ কৰাৰ বাবে যত্নপূৰ্বক প্ৰচেষ্টা চলাই আছে। বৰ্তমান পৰিস্থিতি নিয়ন্ত্ৰণত থাকিলেও কেতিয়া সম্পূৰ্ণৰূপে লিকেজ বন্ধ হ’ব, সেয়া এতিয়াও নিশ্চিতকৈ ক’ব পৰা নাযায়।”

জিলা প্ৰশাসনৰ সহায়ত ONGC নিবিড়ভাৱে কাম কৰি আছে আৰু বিশেষজ্ঞসকলৰ পৰামৰ্শ অনুসৰি শীতলীকৰণৰ বাবে পানী ছিঙা ব্যৱহাৰ কৰা হৈছে বুলি তেওঁ সদৰী কৰে। তেওঁ লগতে “ব্ল’আউট প্ৰিভেণ্টাৰ (BOP)-ৰ সকলো কাৰিকৰী দিশ স্বাভাৱিকভাৱে কাম কৰি আছে বুলি উল্লেখ কৰে।”

এই ঘটনাৰ লগত SK Petro নামৰ কোম্পানী জড়িত বুলি বিভিন্ন মহলৰ পৰা অভিযোগ উঠাৰ পিছত ONGC-ই ইতিমধ্যে আভ্যন্তৰীণ তদন্ত আৰম্ভ কৰিছে। চৌধুৰীয়ে কয়, “আমি এই ঘটনাৰ পৰা শিক্ষা লৈছো আৰু ভৱিষ্যতে এনে বিপদৰ পুনৰাবৃত্তি নহ’বলৈ ব্যৱস্থা ল’ম। তদন্তৰ ফলাফলে SK Petro-ৰ বিৰুদ্ধে প্ৰয়োজনীয় ব্যৱস্থা লোৱাৰ দিশে আগবঢ়িব।”

উল্লেখযোগ্য যে, গেছ লিকেজৰ ফলত প্ৰায় ৩৫০টা পৰিয়ালক স্থানান্তৰ কৰিব লগা হৈছে। এই পৰিয়ালসমূহ বৰ্তমান বনগাঁৱত স্থাপন কৰা অস্থায়ী শিবিৰত আছে। ৰাজ্যৰ মুখ্যমন্ত্ৰী হিমন্ত বিশ্ব শৰ্মাই ঘোষণা কৰিছে যে, “এই পৰিয়ালসমূহ আতংকিত অৱস্থাত আছে, তাই আমি মুখ্যমন্ত্ৰীৰ সাহায্য পুঁজিৰ পৰা প্ৰত্যেক পৰিয়ালক ২৫ হাজাৰ টকাৰ তাৎক্ষণিক আৰ্থিক সহায় আগবঢ়াম।” যদিও পৰিস্থিতি নিয়ন্ত্ৰণৰ ভিতৰত আছে বুলি ONGC-য়ে দাবী কৰিছে, তথাপিও গেছ লিকেজ কেতিয়া বন্ধ হ’ব সেয়া এতিয়াও অনিশ্চিত হৈ থাকিল।