বতৰৰ আগজাননী; ২১ত কংগ্ৰেছৰ নেতৃত্বত হ’ব মহাজোঁটৰ চৰকাৰ : ৰকিবুল হুছেইন

‘এয়া বতৰৰ আগজাননী, ২১ ত কংগ্ৰেছৰ নেতৃত্বত মহাজোঁটৰ চৰকাৰ হ’ব।‘ দিছপুৰত সংবাদ মাধ্যমৰ আগত এই দাবী কৰিছে বিৰোধী উপ দলপতি তথা প্ৰাক্তন কংগ্ৰেছী মন্ত্ৰী ৰকিবুল হুছেইনে।

ইপিনে, হুছেইনৰ মতে এইবাৰ কংগ্ৰেছৰ মহাজোঁটে উজনিত বেছিকৈ আসন লাভ কৰিব।

‘গুৱাহাটীত বহি যিটো দেখি আছো সেইটো নহয়। এইবাৰ কংগ্ৰেছৰ মহাজোঁটে সকলোতকৈ বেছি আসন উজনি অসমত লাভ কৰিব। জনজাতিকৰণ নিদিয়া, ‘কা’, চাহ শ্ৰমিকক মজুৰি নিদিয়া ইত্যাদি ক্ষোভ মানুহৰ মনত আছে। সেই ক্ষোভেই ভোটলৈ ৰূপান্তৰিত হ’ব।‘ হুছেইনে দাবী কৰি এইদৰে কয়।

অৱশ্যে, এআইয়ুডিএফৰ লগত বৰ্তমানলৈকে আনুষ্ঠানিক আলোচনা হোৱা নাই বুলি সদৰী কৰি হুছেইনে লগতে মহাজোঁট হ’ব বুলি দাবী কৰে।

ইপিনে, চৰ্চিত ‘মিঞা সংগ্ৰহালয়’ সন্দৰ্ভতো মুখ খুলি ৰকিবুলে ব্যক্তিগতভাৱে এই প্ৰসংগ সমৰ্থন নকৰে বুলি কয়।

‘ব্যক্তিগত মতামত এই সময়ত মিঞা মিউজিয়ামৰ প্ৰসংগ আহিব নালাগিছিল। এয়া বতৰৰ আগজাননী, কংগ্ৰেছৰ নেতৃত্বত মহাজোঁটৰ চৰকাৰ হ’ব।‘

ইপিনে, মিঞা সংগ্ৰালয় প্ৰসংগতে হিমন্ত বিশ্ব শৰ্মাৰ নাম নোলোৱাকৈ ৰকিবুলে কটাক্ষ কৰি কয় ‘আমাৰ এজনে বিচাৰি আছে এনেধৰণৰ কথা-বতৰাবোৰ আলোচনা হওঁক আৰু পৰিৱেশটো আৰু প্ৰদূষিত হওঁক।‘

‘তেওঁৰ এই কথাবোৰত উজনিৰ মানুহ বিক্ৰী হোৱা নাই। তিনি গগৈক গালি পাৰি যে এটা সম্প্ৰদায়ক অপমান কৰিলে সেই কথা জনসাধাৰণে বুজি পাইছে। সেয়েহে সেই জনসাধাৰণৰ ক্ষোভ আছে। তেওঁ মেৰামতি কৰিবলৈ শিৱসাগৰলৈ গ’ল কিন্তু মেৰামতি নহ’ল।‘ ৰকিবুলে এইদৰে কয়।

ইপিনে, মন্ত্ৰী হিমন্ত বিশ্ব শৰ্মাৰ মুখত সভ্যতাৰ যুঁজ প্ৰসংগই শোভা নাপায় বুলি সদৰী কৰে ৰকিবুলে।

‘তেওঁ সভ্যতাৰ কথা কয়। কিন্তু এজন জনজাতীয় শিক্ষকক দিন দুপৰতে মদ খাই বুলি ৰাজহুৱাকৈ ইতিকিং কৰা শিক্ষামন্ত্ৰীৰ মুখত সভ্যতাৰ কথা শোভা নাপায়। এইবোৰ সভ্যতাৰ চিন নেকি?’ হিমন্তক কটাক্ষ কৰি ৰকিবুলে এইদৰে কয়।