আতচবাজী প্ৰদৰ্শনীৰ পৰা বিয়পিল জুই, মাজনিশাৰ দুৰ্ঘটনাত ১৫০ জন আহত, সংকটজনক ৮ জন

কেৰালাৰ নীলেশ্বৰমৰ সমীপৰ আতচবাজীৰ গুদামত সংঘটিত অগ্নিকাণ্ডত শতাধিক লোক আহত হয়। প্ৰথম অৱস্থাত ১৫০ জনতকৈ অধিক লোক আহত হৈছিল। ইয়াৰে কমেও ৮ জনৰ অৱস্থা সংকটজনক বুলি জানিব পৰা গৈছে।

সোমবাৰে নিশা নীলেশ্বৰমৰ সমীপৰ এটা মন্দিৰত উৎসৱ অনুষ্ঠান চলিছিল। তাতে বিপুল জনসমাগম হৈছিল। গভীৰ নিশা মন্দিৰৰ কাষতে থকা এটা গুদামত অগ্নিকাণ্ড সংঘটিত হয়। অতি কম সময়ৰ ভিতৰতে জুই চৌপাশৰ অঞ্চললৈ বিয়পি পৰে।

ঘটনাৰ খবৰ পাই অগ্নিনিৰ্বাপক বাহিনীৰ লোকে ততাতয়াকৈ ঘটনাস্থলীত উপস্থিত হয়। জুই নমোৱাৰ কাম আৰম্ভ হয়। জিলা দণ্ডাধীশ, আৰক্ষী অধীক্ষকো আহি নিশা সেই স্থানত উপস্থিত হয়।

লগতে পঢ়কঃ শিল্পা শ্বেট্টীৰ ৰেষ্টুৰেণ্ট বাষ্টিয়ানত চুৰি, খাবলৈ আহি অতিথিয়ে হেৰুৱালে ৮০ লাখ টকীয়া গাড়ী

আহতসকলক তাৎক্ষণিকভাৱে উদ্ধাৰ কৰি চিকিৎসালয়লৈ লৈ যোৱা হয়। মেংগালুৰু, কান্নুৰ আৰু কছৰগড়ৰ কেইবাখনো চিকিৎসালয়ত তেওঁলোকক ভৰ্তি কৰোৱা হৈছে।

স্থানীয় সংবাদ মাধ্যমৰ সূত্ৰ অনুসৰি মন্দিৰৰ গাতে লাগি থকা অঞ্চলটোত আতচবাজীৰ প্ৰদৰ্শন চলি আছিল। তেতিয়াই ভুলবশতঃ কাষৰ আতচবাজী গুদাম এটাত ফটকা এটা সোমাই পৰিল। তাৰ পৰাই আতচবাজী গুদামত জুইৰ সূত্ৰপাত হয়। গুদামত আৰু বৃহৎ পৰিমাণৰ আতচবাজী মজুত কৰি ৰখা আছিল। ফলত দ্ৰুতগতিত বিয়পি পৰে জুই।

অৱশ্যে এই অগ্নিকাণ্ডৰ কাৰণ এতিয়াও আনুষ্ঠানিকভাৱে প্ৰকাশ কৰা হোৱা নাই। অগ্নিনিৰ্বাপক বাহিনীৰ বিষয়াই এই বিষয়ত তদন্ত অব্যাহত ৰাখিছে।

লগতে পঢ়কঃ আপোনাৰ সংগীৰ এই ৫টা আচৰণ কেতিয়াও আওকাণ নকৰিব, ই হ’ব পাৰে বিচ্ছেদৰ ইংগিত

বাতৰি অনুসৰি, এই দুৰ্ঘটনাত ১৫০ জনতকৈ অধিক লোক আহত হোৱাৰ লগতে ৮ জন লোকৰ অৱস্থা সংকটজনক। সকলোৱে অগ্নিদগ্ধ হৈছে নে নাই সেয়া অৱশ্যে এতিয়াও স্পষ্ট হোৱা নাই।