ভাৰতৰ সৈতে আলোচনাৰ বাবে আগ্ৰহী পাকিস্তান! বিদেশ ভ্ৰমণৰ মাজতে সদৰী কৰিলে পাক প্ৰধানমন্ত্ৰীয়ে

পেহেলগাম হত্যাকাণ্ডৰ প্ৰতিক্ৰিয়া স্বৰূপে পাকিস্তানৰ উগ্ৰপন্থী আত্মগোপনস্থলীত ভাৰতীয় সেনাৰ ‘অপাৰেচন সিন্দূৰ’ পিছতে দুয়োখন দেশৰ মাজত সামৰিক সংঘৰ্ষ বৃদ্ধি পাইছিল। শেহতীয়াকৈ দুয়োখন দেশৰ  মাজত  যুদ্ধবিৰতি ঘোষণা কৰিছে যদিও কূটনৈতিক ক্ষেত্ৰত অব্যাহত আছে সংঘাত।

সম্প্ৰতি পাকিস্তানে ভাৰতৰ লগত আলোচনাত বহি  কাশ্মীৰ, সন্ত্ৰাসবাদ, পানী বিতৰণ আৰু বাণিজ্যকে ধৰি সকলো দ্বিপাক্ষিক সমস্যা সমাধান কৰিব বিচাৰিছে। সোমবাৰে ইৰাণ ভ্ৰমণৰ সময়ত পাকিস্তানৰ প্ৰধানমন্ত্ৰী শ্বাহবাজ শ্বৰীফে ভাৰতৰ সৈতে আলোচনাৰ বাবে আগ্ৰহী বুলি মত প্ৰকাশ কৰিছে।

যুদ্ধবিৰিতি ঘোষণাৰ পাছতে পাকিস্তানৰ প্ৰধানমন্ত্ৰী শ্বাহবাজ শ্বৰীফে ‘বন্ধুত্বপূৰ্ণ’ সম্পৰ্ক থকা চাৰিখন দেশ ভ্ৰমণত আছে। দেওবাৰে তেওঁ তুৰ্কী ভ্ৰমণ কৰে। তাত তেওঁ ৰাষ্ট্ৰপতি ৰেচেপ টাইপ এৰদোগানৰ সৈতে আলোচনাত মিলিত হয়। ইয়াৰ পিছত তেওঁ ইৰাণলৈ গৈ সোমবাৰে সেই দেশৰ ৰাষ্ট্ৰপতি মাছুদ পিজেস্কিয়ানৰ সৈতে সাক্ষাৎ কৰে।

আলোচনাৰ অন্তত যৌথ সংবাদমেলত শ্বাহবাজে আলোচনাৰ বাৰ্তাৰ উপৰিও প্ৰয়োজন হ’লে সংঘাতৰ পথ মুকলি কৰি ৰখাৰ বাৰ্তাও প্ৰেৰণ কৰে। তেওঁ লগতে কয় যে ভাৰতে সংঘাতৰ পথ বাছি ল’লে ইয়াৰ পৰিণাম ভুগিব লাগিব৷ তেওঁলোকে আক্ৰমণাত্মক হ’লেও  যিকোনো মূল্যৰ বিনিময়ত তেওঁলোকৰ ভূখণ্ড ৰক্ষা কৰিব বুলি মত প্ৰকাশ কৰে।