হিমন্তৰ কটাক্ষৰ উচিত প্ৰত্যুত্তৰ পৰেশ বৰুৱাৰ : স্বাধীন অসমৰ প্রথমজন প্ৰধান মন্ত্ৰী পাতিব হিমন্তক
আজি এখন সংবাদমেলত বিত্ত মন্ত্ৰী ড০ হিমন্ত বিশ্বই ‘পৰেশ বৰুৱা মূল সুঁতিলৈ ঘূৰি আহিলে নাগৰিকত্ব সংশোধনী বিধেয়ক বাতিল কৰিম’ বুলি যি কটাক্ষ কৰিছিল, তাৰ সমুচিত প্ৰত্যুত্তৰ দিছে আলফা (স্বাঃ)ৰ সেনাধ্যক্ষ পৰেশ বৰুৱাই।
আজি সংবাদ মাধ্যমলৈ ফোন কৰি পৰেশ বৰুৱাই কয়, “যদি হিমন্তই মুখ্য মন্ত্ৰী হৈ অসমক স্বাধীন কৰাৰ বাবে ৰাষ্ট্ৰৰ নেতৃত্বক পতিয়ন নিয়াই প্ৰভাৱিত কৰিব পাৰে, তেন্তে আমি অসমলৈ ঘূৰি যাম। আৰু যদি সাৰ্বভৌম স্বাধীন অসম পোৱা যায়, তেৱেঁ প্ৰথমজন প্ৰধান মন্ত্ৰী হ’ব।”
উল্লেখযোগ্য যে আজি দিনৰ ভাগত এখন সংবাদমেল সম্বোধন কৰি মন্ত্ৰী ড০ হিমন্তই অন্যান্য বহুকেইটা প্ৰসংগত মন্তব্য আগ বঢ়োৱাৰ মাজতে পৰেশ বৰুৱাক লৈয়ো কটাক্ষ কৰিছিল। নিজৰ এক্তিয়াৰ বা ক্ষমতাৰ ভিতৰুৱা নোহোৱা সত্ত্বেও মন্ত্ৰী হিমন্তই পৰেশ বৰুৱা ঘূৰি আহিলে নাগৰিকত্ব সংশোধনী বিধেয়ক বাতিল কৰিম বুলি দম্ভালি মাৰিছিল।
তাৰ কেইঘণ্টামানৰ ভিতৰতে পৰেশ বৰুৱাই সংবাদ মাধ্যমলৈ ফোন কৰি তেওঁৰ ক’ব লগীয়াখিনি জনায়।
নাগৰিকত্ব সংশোধনী বিধেয়কখন গৃহীত নহয় বুলি জানিহে মন্ত্ৰীজনে কৌশলগতভাৱে এই প্ৰস্তাৱ আগ বঢ়াইছে বুলি কয় পৰেশ বৰুৱাই। লগতে নাগৰিকত্ব সংশোধনী বিধেয়কখন কেতিয়াও গৃহীত নহয় বুলি দাবী কৰে বৰুৱাই। তেওঁ অসমত এই বিধেয়কখনৰ বিৰুদ্ধে হোৱা ব্যাপক প্ৰতিবাদ সাধাৰণ প্ৰতিবাদ নহয় বুলি দাবী কৰে।
“অসমত যি ধৰণৰ ঢৌ উঠিছে, এয়া সাধাৰণ ঢৌ নহয়।” পৰেশ বৰুৱাই কয়।
হিমন্তক এজন বিচক্ষণ আৰু চতুৰ মন্ত্ৰী বুলিও অভিহিত কৰে আলফা (স্বাঃ)ৰ সেনাধ্যক্ষজনে। “ড০ হিমন্তক এজন বিচক্ষণ আৰু চতুৰ মন্ত্ৰী। তেওঁৰ দৰে এজন লোক অসমৰ মুখ্য মন্ত্ৰী হোৱা উচিত। তেওঁক মই মুখ্য মন্ত্ৰী হোৱাটো বিচাৰো। মনে-প্ৰাণেই বিচাৰো।” এইদৰে কয় বৰুৱাই।
আনহাতে সাৰ্বভৌম অসম অসমীয়া মানুহৰ জন্মস্বত্ব বুলি দাবী কৰিবলৈ নেৰে সেনাধ্যক্ষজনে।
“অসমৰ এতিয়ালৈকে এজনো মুখ্য মন্ত্ৰীয়ে ভাৰত ৰাষ্ট্ৰৰ ওচৰত এইটো ক’বলৈ সাহস নকৰিলে যে অসমৰ সাৰ্বভৌমত্ব অসমীয়া মানুহৰ জন্মস্বত্ব।”
সাহসৰ অভাৱৰ বাবেই এয়া ক’ব নোৱাৰে বুলি কৈ হিমন্তৰ সাহস থকা বুলি কয়। “হিমন্তৰ সাহস আছে। মই হিমন্ত মুখ্য মন্ত্ৰী হোৱাটো বিচাৰো।” আলফা (স্বাঃ)ৰ সেনাধ্যক্ষজনে কয়।