চাপানালাৰ নলবাৰীৰ এটা মূল পথ নিৰ্মাণৰ লেহেমীয়া গতিত ক্ষুণ্ণ স্থানীয় ৰাইজ

নগাঁও-কাৰ্বিআংলং সীমান্তৱৰ্তী নলবাৰী গাঁৱৰ মূল পথটোৰ নিৰ্মাণ কাৰ্য অতি লেহেমীয়া গতিত হোৱাক কেন্দ্ৰ কৰি সম্প্ৰতি সমস্যাৰ সন্মূখীন হ’ব লগীয়া হৈছে বৃহত্তৰ অঞ্চলটোৰ সহস্ৰাধিক গঞা তথা স্থানীয় চাহ-শ্ৰমিক সকল।

চাপানালাৰ নিকটৱৰ্ত্তী নলবাৰী গাঁৱৰ উক্ত মূল পথটোৰ নিৰ্মাণ কাৰ্য চলি আছে বিগত বৰ্ষৰ পৰা। কিন্তু ২০১৯ বৰ্ষতে পথটো নিৰ্মাণৰ কাম আৰম্ভ কৰি বাৰিষাৰ পূৰ্বে আধাতে এৰিব লগীয়া হোৱাৰ বাবে প্ৰায় এবছৰ ধৰি দুৰ্ভোগ ভুগিব আহিছে অঞ্চলোটৰ ৰাইজ।

বাৰিষাৰ আগে আগে পথ চোৱা নিৰ্মাণৰ আধৰুৱা কাম পুনৰ আৰম্ভ কৰিছে যদিও কামৰ গতি আশানুৰূপ ধৰণৰ নহয় বুলি স্থানীয় ৰাইজে অভিযোগ উত্থাপন কৰিছে।

নলবাৰী গাঁৱৰ পৰা চাপানালা সংযোগী প্ৰায় ডেৰ কিলোমিটাৰ দীঘল এই পথছোৱা চাহ বাগিচা অধ্যুষিত অঞ্চলৰ অধীনৰ এক বিশেষ চৰকাৰী আঁচনিৰ যোগেদি প্ৰায় ৯০ লাখ টকা আৱণ্টন দিয়া হৈছে।

ইফালে অতি ৰহস্যজনকভাৱে পথ চোৱাৰ নিৰ্মাণ কাৰ্যত মৰাশিল আৰু বালি ব্যৱহাৰ কৰা দেখি সমুদায় ধন ঠিকাদাৰ তথা নিৰ্মাণ গোষ্ঠীয়ে অপব্যৱহাৰ কৰাৰ সন্দেহ প্ৰকাশ কৰিছে চাপানালাৰ অতি ভিতৰুৱা অঞ্চলটোৰ স্থানীয় ৰাইজে।

অৱশ্যে সুদীৰ্ঘ পথ চোৱা নিৰ্মাণৰ সন্দৰ্ভত ৰাইজে উত্থাপন কৰা সকলো অভিযোগ তথা সন্দেহক পোনচাতেই নাকচ কৰিছে সমগ্ৰ নিৰ্মাণ কাৰ্যটোক তদাৰক কৰি থকা এজন ব্যক্তিয়ে।