ৰজাঘৰৰ আশ্বাসত বন্দী জাঁজীমুখ; এখন দঙলৰ সপোন বাস্তৱ হ’বনে জাঁজীমুখবাসীৰ?

এখন দলং বিচাৰি দশক দশক কাল পাৰ হৈছে যোৰহাট জিলাৰ টীয়কৰ জাঁজীমুখৰ পাৰঘাট অঞ্চল। য’ত ৰজাঘৰৰ আশ্বাসেই হৈ ৰৈছে জনতাৰ সম্বল৷

যোৰহাট জিলাৰ টীয়কৰ জাঁজীমুখৰ জাঁজী আৰু বহ্মপুত্ৰৰ সংগম স্থলতেই অৱস্থিত এই পাৰঘাট৷ বছৰ বছৰ ধৰি এই অঞ্চলৰ ৰাইজ এনেকৈয়ে ভয়াবহভাৱে পাৰ হয় নদীৰ বুকুত।

কিন্তু ৰজাঘৰৰ চকু নপৰে জনতাৰ এই দুৰ্দশাত৷ প্ৰতিটো নিৰ্বাচনৰ আগত ৰাজনৈতিক নেতাৰ মুখত দলং বনোৱাৰ আশ্বাস, ৰাজপাতত বহাৰ পাছত সকলো অসাৰ৷

বান, গৰাখহনীয়াত বিধ্বস্ত নৈপৰীয়া জাঁজীমুখৰ অন্যতম এক সমস্যা হ’ল এই পাৰঘাটত এখন দলঙৰ অভাৱ৷

নৈৰ সিপাৰৰ জপং, বৰমথাউৰি,শগুনপৰা, ৰূপহীমুখকে আদি কৰি প্ৰায় ১০-১৫ খন গাঁৱৰ ৰাইজৰ বহি:জগতৰে যোগাযোগৰ অন্যতম মাধ্যম এখন টুলুঙা নাও৷

ৰজাঘৰীয়াক আবেদন নিবেদন কৰি ভাগৰি পৰা এই সকল ৰাইজ, কণ কণ ছাত্ৰ-ছাত্ৰীয়ে নিতৌ বিপদ সংকুল ভাৱেই টুলুঙা নাৱেৰে পাৰ হয় ভৰা নৈৰ বুুকু।

আকৌ নিৰ্বাচন আহিব, আকৌ প্ৰতিশ্ৰুতি দিব সেয়ে এইবাৰ ৰাইজো সাজু, নিৰ্বাচনৰ আগত দলং নিৰ্মাণ নহ’লে অনাগত নিৰ্বাচনত ৰাজনৈতিক নেতাৰ প্ৰৱেশ নিষিদ্ধ কৰাৰ হুংকাৰ জাঁজীমুখৰ ৰাইজৰ।

এইসকল ক্ষোভিত জনতাক নিৰ্বাচনৰ প্ৰাক ক্ষণত শাসনাধিষ্ট চৰকাৰখনে কেনেদৰে সন্তুষ্ট কৰে সেয়া হ’ব লক্ষ্যণীয়।