অসমে নোৱাৰিলেও প্লাষ্টিকমুক্ত কৰাৰ দৃষ্টান্ত দেখুৱাইছে নাগালেণ্ডে
এখন প্লাষ্টিকমুক্ত নাগালেণ্ডৰ বাবে অভিযানৰ অংশ হিচাপে ডিমাপুৰৰ উপায়ুক্ত কেভেখা কেভিন জেহলে সোমবাৰে বেচৰকাৰী সংস্থা, ডিমাপুৰ পৌৰ পৰিষদ আৰু ডিমাপুৰৰ উপায়ুক্ত কাৰ্যালয় চৌহদত থকা প্ৰশাসনীয় বিষয়াসকলৰ মাজত জৈৱ পচনশীল মোনা (bio-degradable bags) বিতৰণ কৰে।
চৰকাৰীভাৱে প্ৰকাশ কৰা প্ৰেছ বিজ্ঞপ্তি এটা সোমবাৰে বিয়লি এই কথা প্ৰকাশ কৰা হৈছে।
প্ৰেছ বিজ্ঞপ্তিটোত লগতে প্ৰকাশ কৰা অনুসৰি প্লাষ্টিকমুক্ত নাগালেণ্ড কাৰ্যসূচীৰ অংশ হিচাপে মুখ্য মন্ত্ৰীৰ সাহায্য পুঁজিৰ অধীনত এই জৈৱ পচনশীল মোনাসমূহ বিতৰণ কৰা হৈছে।
কেভেখাই লগতে ডিমাপুৰ চেম্বাৰ্ছ অৱ কমাৰ্ছ, বিজনেছ এছোচিয়েশ্যন অৱ নাগা’ছ, ইষ্ট ডিমাপুৰ বিজনেছ এছোচিয়েশ্যন, নিয়ুলেণ্ড আৰু মেডজিফেমাৰ অতিৰিক্ত উপায়ুক্ত, ডিমাপুৰ পৌৰ পৰিষদ আৰু ডিমাপুৰ উপায়ুক্তৰ কাৰ্যালয়ক গ্ৰীণ ছলিউশ্যন বেগ প্ৰদান কৰে।
এই বিতৰণ কাৰ্যসূচীৰ পাছতে তেওঁ এই পৰিৱেশ উপযোগী বেগসমূহ সকলো ৰাইজকে ব্যৱহাৰ কৰিবলৈ আহ্বান জনায় যাতে প্লাষ্টিক বেগৰ ব্যৱহাৰ প্ৰায় নিৰ্মূল কৰিব পৰা যায়।
আনহাতে, অসমত বহুদিনৰে পৰা প্লাষ্টিকমুক্ত কৰাৰ শ্ল’গান দি বহু সংগঠনে ৰাজপথত সজাগতা কাৰ্যসূচীৰ আয়োজন কৰি আহিছে যদিও চৰকাৰ তথা প্ৰশাসনৰ ফালৰ পৰা এইক্ষেত্ৰত কোনো কাৰ্যকৰী ব্যৱস্থা গ্ৰহণ কৰা দেখা যোৱা নাই।