বংগবন্ধু মুজিবুৰ ৰহমানৰ শতবাৰ্ষিকীত বিশেষ অতিথি হিচাপে আমন্ত্ৰিত প্ৰধান মন্ত্ৰী নৰেন্দ্ৰ মোদী
বাংলাদেশৰ ঢাকাত অনুষ্ঠিত হ’বলগীয়া মুজিবুৰ ৰহমানৰ শতবাৰ্ষিকীৰ অনুষ্ঠানত বিশেষ অতিথি হিচাপে আমন্ত্ৰিত সকলৰ মাজত আছে প্ৰধান মন্ত্ৰী নৰেন্দ্ৰ মোদী।
অহা মাহত অনুষ্ঠিত হ’বলগীয়া অনুষ্ঠানটোত প্ৰধান মন্ত্ৰী নৰেন্দ্ৰ মোদীক বিশেষ অতিথি হিচাপে আমন্ত্ৰণ কৰাৰ অন্যতম কাৰণ হৈছে দেশখনৰ স্বাধীনতা সংগ্ৰামত ভাৰতে এক গুৰুত্বপূৰ্ণ ভূমিকা গ্ৰহণ কৰিছিল।
ব্ৰিটেইনত বাংলাদেশৰ উচ্চায়ুক্ত চৈয়দা মুনা তাচনিমে এই কথা জানিবলৈ দিয়ে।
উচ্চায়ুক্ত গৰাকীয়ে জানিবলৈ দিয়া মতে বংগবন্ধু বা বাংলাৰ জনক শ্বখ মুজিবুৰ ৰহমানৰ ১দদ সংখ্যক জন্ম বাৰ্ষিকী অহা ১৭ মাৰ্চত অনুষ্ঠিত কৰাৰ লগতে এবছৰ ধৰি বাংলাদেশৰ লগতে ব্ৰিটেইনতো বৰ্ষজোৰা এলানি কাৰ্যসূচীৰে উদযাপন কৰা হ’ব।
সংবাদ প্ৰতিষ্ঠানৰ আগত তানচিমে কয় যে প্ৰধান মন্ত্ৰী মোদীক বিষেষ অতিথিসকলৰ মাজত ৰখা হৈছে কিয়নো ১৯৭১ চনত বংগবন্ধুৰ অভিষেকৰ লগত ইয়াৰ সম্পৰ্ক আছে।
গোটেই পৰিকল্পনাটো লণ্ডনত আৰম্ভ হৈছিল য’ত তেওঁক স্বাধীন বাংলাদেশৰ ৰাষ্ট্ৰপতি হিচাপে আনুষ্ঠানিক স্বীকৃতি দিয়া হয়। ইয়াৰ পাছত তেওঁ দিল্লীলৈ উৰা মাৰিছিল আৰু তদানীত্বন ভাৰতীয় প্ৰধান মন্ত্ৰী ইন্দিৰা গান্ধীৰ সৈতে এখন ৰাজহুৱা সভা অনুষ্ঠিত কৰিছিল।
তদুপৰি, পাকিস্তানৰ কৰাচীৰ জেইলৰ পৰা শেবখ মুজিবক মুকলি কৰাৰ ক্ষেত্ৰত ব্ৰিটেইনৰ তদানীত্বন প্ৰধান মন্ত্ৰী এডৱাৰ্ড হিথৰ লগতে ইন্দিৰা গান্ধীয়েও সক্ৰিয় ভূমিকা গ্ৰহণ কৰিছিল।
উচ্চায়ুক্ত গৰাকীয়ে লগতে জানিবলৈ দিয়ে যে ভাৰতৰ সংসদে গৃহীত কৰা নাগৰিকত্ব সংশোধনী আইন ৰূপায়ন হ’লে ই বাংলাদেশৰ বাবে ‘ক্ষতিকাৰক’ হ’ব।
‘’প্ৰধান মন্ত্ৰী শ্বেখ হাছিনাই কৈছে যে এইটো ভাৰতৰ আভ্যন্তৰীণ বিষয় যদিও একেবাৰে অপ্ৰয়োজনীয়। বাংলাদেশৰ বঙালী হিন্দুসকল ভালেই আছে, বিশেষকৈ অংক আৰু একাউন্টছ বিষয়ত তেওঁলোক পাৰদৰ্শী,’’-তেওঁ কয়।
দিল্লীৰ শেহতীয়া অশান্ত জৰ্জৰ পৰিস্থিতিৰ মাজত কিছুমানে অহা মাহত ঢাকাত অনুষ্ঠিত হ’বলগীয়া অনুষ্ঠানলৈ মোদীৰ নিমন্ত্ৰণ বাতিল কৰিবলৈ আহ্বান জনাইছিল যদিও বাংলাদেশ চৰকাৰে সেয়া অগ্ৰাহ্য কৰে।