২ জানুৱাৰীত মিৰাটত মেজৰ ধ্যান চান্দ ক্ৰীড়া বিশ্ববিদ্যালয়ৰ আধাৰশিলা স্থাপন কৰিব মোদীয়ে

প্ৰধানমন্ত্ৰী শ্ৰী নৰেন্দ্ৰ মোদীয়ে ২ জানুৱাৰীত মিৰাটৰ মেজৰ ধ্যান চান্দ ক্ৰীড়া বিশ্ববিদ্যালয়ৰ আধাৰশিলা স্থাপন কৰিব।

মিৰাটৰ সাৰধনা চহৰৰ চালাৱা আৰু কাইলী গাঁৱত প্ৰায় ৭০০ কোটি টকাৰ আনুমানিক ব্যয়ত বিশ্ববিদ্যালয়খন স্থাপন কৰা হ’ব।

প্ৰধানমন্ত্ৰী কাৰ্যালয়ৰ পৰা প্ৰকাশিত এটা বিবৃতিত কোৱা হৈছে যে প্ৰধানমন্ত্ৰী মোদীৰ বাবে গুৰুত্বপূৰ্ণ ক্ষেত্ৰসমূহৰ ভিতৰত ক্ৰীড়া সংস্কৃতি গঢ়ি তোলা আৰু দেশৰ সকলো প্ৰান্ততে বিশ্বমানৰ ক্ৰীড়া আন্তঃগাঁথনি স্থাপন কৰা অন্যতম। মিৰাটত এই বিশ্ববিদ্যালয় স্থাপন এই দৃষ্টিভংগী পূৰণৰ দিশত এক গুৰুত্বপূৰ্ণ পদক্ষেপ হ’ব।

ক্ৰীড়া বিশ্ববিদ্যালয়খনত আধুনিক আৰু অত্যাধুনিক ক্ৰীড়া আন্তঃগাঁথনি উপলব্ধ হ’ব। ইয়াৰ ভিতৰত আছে হকী আৰু ফুটবল খেলপথাৰ, বাস্কেটবল, ভলীবল, হেণ্ডবল আৰু কাবাডীৰ বাবে এখন খেলপথাৰ, লন টেনিছ কোৰ্ট, জিমনেছিয়াম হল, ৰানিং ষ্টেডিয়াম, চুইমিং পুল, বহুমুখী হল আৰু চাইকেল চলোৱা ভেলোড্ৰম।

ইয়াত অন্যান্য সুবিধাৰ লগতে শ্বুটিং, স্কোৱাছ, জিমনাষ্টিক, ভাৰোত্তোলন, আৰ্চাৰী, কেনোয়িং আৰু কায়াকিংৰ সুবিধাও থাকিব।

বিবৃতিটোত কোৱা হৈছে যে বিশ্ববিদ্যালয়খনত ৫৪০ গৰাকী মহিলা আৰু ৫৪০ জন পুৰুষ খেলুৱৈকে ধৰি ১,০৮০ জন খেলুৱৈক প্ৰশিক্ষণ দিয়াৰ ক্ষমতা থাকিব।