অসমৰ বানত নিহতৰ নিকট আত্মীয়লৈ ২লাখ টকাৰ সাহায্য ঘোষণা প্ৰধান মন্ত্ৰীৰ
প্ৰধান মন্ত্ৰী নৰেন্দ্ৰ মোদীয়ে অসমৰ বানত নিহতসকলৰ নিকটতম আত্মীয়লৈ দুই লাখকৈ টকাৰ সাহায্য শুকুৰবাৰে ঘোষণা কৰিছে।
প্ৰধান মন্ত্ৰীৰ ৰাষ্ট্ৰীয় সাহায্য পুঁজিৰ পৰা এই ধনৰাশি আগবঢ়োৱা হ’ব।
প্ৰধান মন্ত্ৰী মোদীয়ে শুকুৰবাৰে অসমৰ মুখ্য মন্ত্ৰী সৰ্বানন্দ সোণোৱাললৈ ফোন কৰি বান-গৰাখহনীয়া পৰিস্থিতিৰ বুজ লৈছিল।
PM @narendramodi has sanctioned ex-gratia of Rs. 2 lakh each for next of kin of persons who lost their lives due to floods in Assam, from PMNRF.
— PMO India (@PMOIndia) July 3, 2020
প্ৰধান মন্ত্ৰী মোদীয়ে এইক্ষেত্ৰত অসমক সকলো সহায় আগবঢ়োৱাৰ আশ্বাস দিছিল।
অসমৰ চলিত বানত এতিয়ালৈকে ৩৪গৰাকী লোকে প্ৰাণ হেৰুৱাইছে।
বানত অসমৰ ২২খন জিলাৰ প্ৰায় ১৬লাখ লোক ক্ষতিগ্ৰস্ত হৈছে।
বানপীড়িত জিলাকেইখনৰ ৬০টা ৰাজহ চক্ৰৰ ২০৫৩খন গাঁৱত পানী সোমাইছে আৰু ৭২,৭১৭ হেক্তৰ কৃষিভূমি পানীত বুৰ গৈছে।
অসমত এতিয়ালৈকে ১৬৩টা আশ্ৰয় শিৱিৰত ১২,৫৯৭গৰাকী লোকে আশ্ৰয় গ্ৰহণ কৰিছে। তাৰোপৰি বৃহৎসংখ্যক লোকে পথ, ওখ ঠাই আৰু আন নিৰাপদ স্থানত আশ্ৰয় লৈ আছে।
চলিত বানত ১৩ লাখতকৈ অধিক ঘৰচীয়া জীৱ-জন্তুও ক্ষতিগ্ৰস্ত হৈছে।
কাজিৰঙা ৰাষ্ট্ৰীয় উদ্যান আৰু পবিতৰা অভয়াৰণ্যৰ বিস্তৰ অঞ্চল পানীত বুৰ গৈছে।