নিৰ্বাচনৰ আগত প্ৰধানমন্ত্ৰীৰ সিদ্ধান্ত : বিক্ৰী বন্ধ হ’ব পাৰে চিগাৰেটৰ
নিৰ্বাচনৰ পূৰ্বেই ব্ৰিটিছ প্ৰধানমন্ত্ৰী ঋষি সুনাকে ল’বলৈ ওলাইছে এটা বৃহৎ সিদ্ধান্ত। ব্ৰিটেইনত নিষিদ্ধ হ’ব পাৰে চিগাৰেট।
ব্ৰিটেইনত যাতে আগন্তুক প্ৰজন্মৰ বাবে চিগাৰেট উপলব্ধ নহয় তাৰ বাবে পদক্ষেপ ল’বলৈ ওলাইছে ঋষি সুনাকে।
জানিব পৰা মতে, যোৱা বছৰ নিউজিলেণ্ড চৰকাৰে চিগাৰেট বিক্ৰী নিষিদ্ধ কৰাৰ সিদ্ধান্ত অনুসৰণ কৰিব বিচাৰিছে ঋষি সুনাকে।
যোৱা বছৰ নিউজিলেণ্ড চৰকাৰে ঘোষণা কৰিছিল যে ২০০৯ চনৰ ১ জানুৱাৰীৰ পিছত জন্ম হোৱা কোনো লোকক চিগাৰেট বিক্ৰী কৰিব নোৱাৰিব। ঋষি সুনাকেও সেই সিদ্ধান্ত অনুকৰণ কৰিবলৈ ওলাইছে।
ব্ৰিটিছ চৰকাৰৰ এগৰাকী মুখপাত্ৰই কয় যে আমি বিচাৰোঁ যে সাধাৰণ মানুহে ধূমপান ত্যাগ কৰক। আমাৰ লক্ষ্য ২০৩০ চনৰ ভিতৰত দেশখন ধূমপানমুক্ত কৰা। ইতিমধ্যে চৰকাৰে ধূমপান কমাবলৈ কেইবাটাও পদক্ষেপ গ্ৰহণ কৰিছে।
খবৰ অনুসৰি ধূমপান এৰিবলৈ বিনামূলীয়াকৈ ভেপ কিট দিয়া হৈছে। ইয়াৰ উপৰিও গৰ্ভৱতী মহিলাক ধূমপান এৰিবলৈ ভাউচাৰ আঁচনিৰ প্ৰস্তাৱ দিয়া হৈছে। চিগাৰেটৰ পেকেটৰ ভিতৰতো বাধ্যতামূলক সতৰ্কবাণী সংযোজন কৰা হৈছে।
যদিও চৰকাৰে এই সন্দৰ্ভত সবিশেষ প্ৰকাশ কৰা নাই, তথাপিও সূত্ৰ অনুসৰি অহা বছৰৰ নিৰ্বাচনৰ পূৰ্বে এই পদক্ষেপসমূহ গ্ৰহণ কৰিব বিচাৰিছে ঋষি সুনাকে।
আনহাতে, ইংলেণ্ড আৰু ৱেলছৰ কাউন্সিলেও যোৱা জুলাই মাহত চৰকাৰক পৰামৰ্শ দিছিল যে ২০২৪ চনৰ ভিতৰত দেশত চিগাৰেট বিক্ৰী বন্ধ কৰিব লাগে।