তেওঁৰ কিতাপৰ ত্ৰুটি আঙুলিয়াই দিয়া অৰুণাচলৰ ছাত্ৰীক মোদীৰ ধন্যবাদ

নৰেন্দ্ৰ মোদীৰ ‘Exam Warriors’ নামৰ পুথিখনৰ সন্দৰ্ভত পৰামৰ্শ আগবঢ়াই প্ৰধানমন্ত্ৰী গৰাকীৰ পৰা প্ৰশংসা বুটলিবলৈ সক্ষম হৈছে অৰুণাচল প্ৰদেশৰ এগৰাকী ছাত্ৰী।

কালি অৰ্থাৎ দেওবাৰে ‘মন কি বাত’ অনুষ্ঠানত নৰেন্দ্ৰ মোদীয়ে অৰুণাচলৰ ৰয়িঙৰ ছাত্ৰী এলীনা টায়েঙৰ কথা উল্লেখ কৰি কয় ছাত্ৰীগৰাকীয়ে দুবাৰকৈ কিতাপখন পঢ়িছে আৰু মোদীক কিতাপখনৰ নতুন সংস্কৰণত অভিভাৱক আৰু শিক্ষকসকলৰ বাবে ‘মন্ত্ৰ’ অন্তৰ্ভুক্ত কৰিবলৈ অনুৰোধ জনাইছে।

প্ৰধনামন্ত্ৰী গৰাকীলৈ লিখা পত্ৰত ছাত্ৰীগৰাকীয়ে কয় যে তেওঁ কিতাপখন ‘দুবাৰতকৈ বেছি’ পঢ়িছে আৰু পঢ়ি যথেষ্ট ভাল পাইছে।

উল্লেখযোগ্য যে নৰেন্দ্ৰ মোদীৰ ‘Exam Warriors’ কিতাপখন হৈছে ছাত্ৰ-ছাত্ৰীসকলৰ বাবে ৰচনা কৰা এখন অনুপ্ৰেৰণামূলক হাতপুথি।

ইয়াত ছাত্ৰ-ছাত্ৰীসকলে কিদৰে পৰীক্ষাৰ চাপৰ পৰা নিজকে মুক্ত কৰি ৰাখিব পাৰে তাৰ পৰামৰ্শ আগবঢ়োৱা হৈছে।

ছাত্ৰী গৰাকীৰ মতে কিতাপখনত অভিভাৱক আৰু শিক্ষক-শিক্ষয়িত্ৰীসকলৰ বাবেও কিছু পৰামৰ্শ থাকিব লাগে আৰু মোদীয়ে যদি এটা সংস্কৰণ লিখাৰ কথা ভাবিছে তেন্তে তাত সেইসমূহ অন্তৰ্ভুক্ত কৰিবলৈ অনুৰোধ জনায়।

মোদীয়ে কয়, ‘দুবাৰতকৈ অধিক Exam Warriors পঢ়াৰ বাবে তোমাক ধন্যবাদ আৰু কিতাপখনত থকা ভূল-ত্ৰুটি আঙুলিয়াই দিয়াৰ বাবে বিশেষভাৱে ধন্যবাদ’।

‘তুমি মোক কোৱাৰ দৰে, এটা নতুন সংস্কৰণ লিখাৰ বাবে মই যেতিয়া সময় পাম মই নিশ্চয় অভিভাৱক আৰু শিক্ষকসকলৰ বাবে কিবা লিখিবলৈ চেষ্টা কৰিম’ মোদীয়ে কয়।

আনহাতে প্ৰধানমন্ত্ৰী মোদীয়ে তেওঁৰ পত্ৰখনৰ কথা পৰা ‘মন কি বাত’ অনুষ্ঠানত উল্লেখ কৰাত উৎফুল্লিত হৈ পৰে এলীনা টায়েং। প্ৰধানমন্ত্ৰী গৰাকীৰ পৰা এইদৰে প্ৰশংসা পাব বুলি ভবা নাছিল বুলি উল্লেখ কৰি তেওঁ মোদীক ধন্যবাদ জনায়।