অখিল বৰ্তমানো জেইলত! পুনৰ কাৰাৰুদ্ধ হোৱাৰ পূৰ্ণ সম্ভাৱনা কৃষক মুক্তিৰ ধৈয্য বিতু আৰু মানস

পুনৰ কাৰাৰুদ্ধ হোৱাৰ সম্ভাৱনা প্ৰকট হৈ পৰিছে কৃষক মুক্তি সংগ্ৰাম সমিতিৰ সাধাৰণ সম্পাদক ধৈয্য কোঁৱৰ, ছাত্ৰ মুক্তি সংগ্ৰাম সমিতিৰ সভাপতি বিতু সোণোৱাল আৰু কাৰ্যকৰী সভাপতি মানস কোঁৱৰ।

কালি চান্দমাৰীস্থিত NIA ৰ আদালতত অখিল গগৈৰ জামিন আবেদন নাকচ কৰাৰ পাছতে উচ্চ ন্যায়ালয়ৰ দ্বাৰস্থ হৈছে ৰাষ্ট্ৰীয় তদন্তকাৰী সংস্থা চমুকৈ NIA।

উচ্চ ন্যায়ালয়ত ক্ৰিমিনেল আপীল দাখি কৰিছে NIA ৰ অধিবক্তাই। তিনিওজন নেতাৰ জামিনক প্ৰত্যাহ্বান জনাই ‘নিয়া’ৰ অধিবক্তাই গুৱাহাটী উচ্চ ন্যায়ালয়ত দাখিল কৰিছে ক্ৰিমিনেল আপীল।

ইয়াৰোপৰি, জানিব পৰা মতে নিয়াৰ অধিবক্তাই ন্যায়ালয়ত তিনিওজন নেতাৰ জামিন প্ৰত্যাহাৰ বা কৰ্তন কৰিব লাগে বুলি আবেদন জনাইছে।

প্ৰায় ৭ মাহ ধৰি কাৰাৰুদ্ধ হৈ থকা ধৈয্য, বিতু আৰু মানসৰ যোৱা ১৭ জুলাইত জামিন লাভ কৰি ১৯ জুলাইত মুকলি আকাশৰ তললৈ আহিছিল।  চানমাৰি থানাৰ ১৩/১৯ নম্বৰ ‘নিয়া’ৰ গোচৰত জামিন লাভ কৰি তিনিওজন নেতা মুকলি আকাশৰ তললৈ ওলাই আহিছিল।

তাৰ পাছতে পুনৰ তিনিওজন নেতাক গ্ৰেপ্তাৰ কৰি কাৰাৰুদ্ধ কৰাৰ বাবে সাজু হৈ উঠিছে NIA।

ইয়াক লৈ প্ৰতিক্ৰিয়া প্ৰকাশ কৰি তাৰ কাৰণো দৰ্শালে ছাত্ৰ মুক্তি সংগ্ৰাম সমিতিৰ সাধাৰণ সম্পাদক প্ৰাঞ্জল কলিতাই।

তেওঁ কয় ‘তিনিওজন কাৰাগাৰৰ পৰা বাহিৰলৈ ওলোৱাৰ পাছত ব্যাপক ৰূপত ‘কা’ৰ বিৰুদ্ধে প্ৰতিবাদ আৰম্ভ হ’ল। তাৰোপৰি তিনিও সংবাদমেল সম্বোধন কৰি চৰকাৰৰ বহুকেইটা ভুল উদঙাই দিলে। সেয়েহে চলে বলে কৌশলে পুনৰ তিনিওকে কাৰাৰুদ্ধ কৰিব বিচৰা হৈছে। চৰকাৰখনে ভাবিছে অখিল গগৈক যদি নিৰ্বাচনৰ পূৰ্বে বাহিৰলৈ উলিয়াই দিয়ে তেন্তে ২১ ৰ নিৰ্বাচনত তেওঁলোক পৰাস্ত হ’ব।‘

উল্লেখযোগ্য যে, NIA ৰ একেটা গোচৰত তিনিজন কৃষক নেতাই জামিন লাভ কৰি মুকলি আকাশৰ তললৈ আহিল যদিও একেটা গোচৰত বৰ্তমানো কাৰাৰুদ্ধ হৈ আছে অখিল গগৈ।