কোকৰাঝাৰত ‘‘ন’ এছ টি ন’ ৰেষ্ট’’ ধ্বনিৰে উত্তাল প্ৰতিবাদ

আদিৱাসী সকলৰ প্ৰতিবাদী ধ্বনিত আজি কঁপি উঠিল কোকৰাঝাৰ। আদিবাসী ছিংগল অভিযান আৰু ঝাৰখণ্ড ডিছম পাৰ্টিৰ অসম ৰাজ্যিক সমিতিয়ে আদিবাসীসকলৰ দীৰ্ঘদিনীয়া দাৱীসমূহ পূৰণ কৰাৰ বাবে আজি কোকৰাঝাৰত ধৰ্ণা কাৰ্য্যসূচী ৰূপায়ণ কৰে।

ৰাতিপুৱা প্ৰতিবাদকাৰীসকলে ‘‘ন’ এছ টি ন’ ৰেষ্ট’’ ধ্বনিৰে সমদল কৰি কোকৰাঝাৰ ৰে’ল ষ্টেইশ্যনৰ পৰা চহৰৰ মাজেৰে গৈ জিলা উপায়ুক্তৰ কাৰ্য্যলয় চৌহদত উপস্থিত হয়।

উপায়ুক্ত কাৰ্য্যলয় চৌহদত পালন কৰা প্ৰায় তিনিঘণ্টা জোৰা ধৰ্ণা কাৰ্য্যসূচীৰ অন্তত প্ৰতিবাদকাৰী সকলে জিলা উপায়ুক্তৰ জৰিয়তে দেশৰ প্ৰধান মন্ত্ৰীলৈ স্মাৰক পত্ৰ প্ৰেৰণ কৰে।

স্মাৰক পত্ৰখনত জনজাতিকৰণকে ধৰি আদিবাসীসকলৰ সাৰনা ধৰ্মক ৰাষ্ট্ৰীয় মান্যতা প্ৰদান, শিক্ষানুষ্ঠানসমূহত চাওঁতালী ভাষা (অ’ল-চিকি লিপি)ত শিক্ষাগ্ৰহণ বাধ্যতামূলক কৰা আদিকে ধৰি কেইবাটাও দাবী সন্নিৱিষ্ট কৰা হয়।

ধৰ্ণা কাৰ্য্যসূচীত আদিবাসী ছিংগল অভিযানৰ জিলা উপ-সভাপতি বিমল সুৰেন, ঝাৰখণ্ড ডিছম পাৰ্টিৰ অধ্যক্ষ কিছুনাথ মুৰ্মুকে ধৰি কেইবাগৰাকীও আগশাৰীৰ নেতা-কৰ্মী উপস্থিত থাকে।

আনহাতে, ধৰ্ণাত অংশগ্ৰহণ কৰা হেমব্ৰম নামৰ এগৰাকী মহিলা প্ৰতিবাদৰ সময়তে অচেতন হৈ পৰে।কৰ্তব্যৰত আৰক্ষীয়ে টতাতয়াকৈ অচেতন মহিলাগৰাকীক স্থানীয় চিকিৎসালয়ত ভৰ্তি কৰায়।