শিৱসাগৰত সোণোৱালৰ শৱযাত্ৰা, সোণোৱাল গ’ বেক, মোদী গ’ বেক ধ্বনিৰে বিধেয়কৰ বিৰুদ্ধে প্ৰতিবাদ

ন ন প্ৰতিবাদী ভাষাত চলিছে নাগৰিকত্ব সংশোধনী বিধেয়কৰ বিৰোধিতা। উলংগ প্ৰতিবাদৰ পৰা ছাত্ৰ-ছাত্ৰীৰ শ্ৰেণী বৰ্জন, বিজেপিৰ কাৰ্য্যালয় ঘেৰাও, গেলাকণী নিক্ষেপ আদি বিভিন্ন পন্থাৰে অসমৰ ক্ষুভিত জনগণে তেওঁলোকৰ প্ৰতিবাদ সাব্যস্ত কৰিছে। ১২ জানুৱাৰিত শিৱসাগৰত সংগ্ৰামী যুৱ ছাত্ৰ পৰিষদে মুখ্য মন্ত্ৰী সৰ্বানন্দ সোণোৱালৰ শৱযাত্ৰাৰে জোঁৰসমদল কৰি এই বিধেয়কখনৰ বিৰুদ্ধে প্ৰতিবাদী কাৰ্য্যসূচী ৰূপায়ণ কৰে।

১২ জানুৱাৰিৰ সন্ধিয়া সংগ্ৰামী যুৱ ছাত্ৰ পৰিষদ, অসম শিৱসাগৰ জিলা সমিতিৰ উদ্যোগত আৰু আমগুৰি আঞ্চলিক সমিতিৰ সহযোগত চামগুৰি চাৰিআলিত মুখ্য মন্ত্ৰী সৰ্বানন্দ সোণোৱালৰ শৱযাত্ৰাৰ লগতে জোঁৰসমদল উলিওৱা হয়।

কাৰ্য্যসূচী ৰূপায়ণৰ সময়ত প্ৰতিবাদকাৰীসকলে সৰ্বানন্দ সোনোৱাল গ’ বেক, সৰ্বানন্দ সোণোৱাল জাতিদ্ৰোহী, বিজেপি হঁচিয়াৰ, নৰেদ্ৰ মোদী হঁচিয়াৰ আদি শ্ল’গানেৰে চামগুৰিৰ ৰাজপথ উত্তাল কৰি তোলে। ইয়াৰ উপৰি ৰাজ পথত মুখ্য মন্ত্ৰী সৰ্বানন্দ সোণোৱালৰ শৱ জ্বলায় প্ৰতিবাদকাৰীসকলে।

প্ৰায় পাঁচ শতাধিক ৰাইজে সমদল কৰি চামগুৰি চাৰিআলিত এখন ৰাজহুৱা সভাৰ আয়োজন কৰি বিজেপি নেতৃত্বাধীন ৰাজ্য আৰু কেন্দ্ৰীয় চৰকাৰক তীব্ৰ সমালোচনা কৰে।

উক্ত কাৰ্যসূচীত সংগ্ৰামী যুৱ ছাত্ৰ পৰিষদ অসমৰ কেন্দ্ৰীয় সমিতিৰ সভাপতি দেৱদিৎ দত্ত, উপ- সভাপতি অৰূপ বৰুৱা, শিৱসাগৰ জিলা সমিতিৰ সভাপতি বিজয় কৃষ্ণ দুৱৰা, সাধাৰণ সম্পাদক পল্লৱ গগৈ উপস্থিত থাকে।

প্ৰতিবাদী সভাত কেন্দ্ৰীয় সভাপতি দেৱজিৎ দত্তই  বিধান সভাৰ নিৰ্বাচনৰ সময়ত শৰাইঘাটৰ শেষ ৰণ বুলি কোৱা বৰ্তমানৰ মুখ্য মন্ত্ৰী সৰ্বানন্দ সোণোৱালক অসমৰ ৰাইজে সেনাপতি পাতিছিল। কিন্তু অতি দুখৰ কথা যে এইজন সেনাপতিয়ে আজি কেন্দ্ৰীয় চৰকাৰৰ ওচৰত তথা নৰেন্দ্ৰ মোদীৰ ওচৰত আঁঠু লৈ লোকসভাত নাগৰিকত্ব সংশোধনী বিধেয়ক গৃহীত কৰালে।  শৰাইঘাটৰ শেষ ৰণৰ সেনাপতি সৰ্বানন্দ সোনোৱাল আজিৰ তাৰিখত এজন মিথ্যাবাদী আৰু পৰিতাজ্য সেনাপতি হিচাপে ঘোষণা কৰে। দত্তই কয়, “সৰ্বানন্দ সোণোৱালৰ গাত যদি অসমীয়াৰ তেজ আছে, লাচিতৰ তেজ আছে, বাঘ হাজৰিকাৰ তেজ আছে, চাওলুং চ্যুকাফাৰ তেজ আছে বা চিলাৰায় তেজ আছে তেন্তে অতিশীঘ্ৰে মুখ্য মন্ত্ৰীৰ পদত্যাগ কৰিব লাগে, নহ’লে ইতিহাসৰ পাতত এজন কলংকিত মুখ্য মন্ত্ৰী হিচাপে চিহ্নিত হৈ থাকিব”।