সুৰেশ ৰাইনাই আই পি এলৰ মাদকতা আৰু ধন দুয়োটাই হেৰুৱাব; চেন্নাই চুপাৰ কিংগছৰ স্বত্তাধিকাৰীৰ মন্তব্য
ক’ৰ’না ভাইৰাছৰ সংক্ৰমণৰ বাবে য়ু এ ইত অনুষ্ঠিত হ’বলগীয়া ২০২০ বৰ্ষৰ আই পি এলৰ পূৰ্বে আই পি এলৰ পৰা নিজৰ নাম প্ৰত্যাহাৰ কৰি ভাৰতলৈ উভতি অহা চেন্নাই চুপাৰ কিংগছৰ তাৰকা অলৰাউণ্ডাৰ সুৰেশ ৰাইনা সন্দৰ্ভত মত ব্যক্ত কৰিছে চেন্নাই চুপাৰ কিংগছৰ স্বত্তাধিকাৰী এন শ্ৰীনিবাসনে।
শ্ৰীনিবাসনে ৰাইনাই ব্যক্তিগত কাৰণৰ বাবে আই পি এলৰ পৰা নিজৰ নাম প্ৰত্যাহাৰ কৰাৰ পাছত শ্ৰীনিবাসনে কয় যে, আই পি এল এতিয়াও আৰম্ভ হোৱা নাই আৰু ৰাইনাই আই পি এলৰ মাদকতাৰ লগতে ইয়াৰ পৰা লাভ কৰিবলগীয়া ধনো হেৰুৱাব যিটো খেলুৱৈ গৰাকীয়ে পৰৱৰ্তী সময়ত উপলব্ধি কৰিব।
উল্লেখযোগ্য যে, ক’ৰ’না মহামাৰীৰ বাবে বি চি চি আইয়ে চলিত বৰ্ষৰ আই পি এল ভাৰতৰ পৰিৱৰ্তে য়ু এ ইত অনুষ্ঠিত কৰাৰ বাবে সিদ্ধান্ত গ্ৰহণ কৰিছিল।
বি চি চি আইয়ে বান্ধি দিয়া নীতি-নিৰ্দেশনা পালন কৰি আই পি এলৰ প্ৰতিটো দল ডুবাইত উপস্থিত হোৱাৰ পাছতে চেন্নাই চুপাৰ কিংগছ শিৱিৰৰ ১১ গৰাকী সদস্যৰ শৰীৰত ক’ৰ’না ভাইৰাছৰ উপস্থিতি ধৰা পৰে।
চেন্নাই চুপাৰ কিংগছৰ সদস্য ক’ৰ’না প’জিটিভ হোৱাৰ পাছতে সুৰেশ ৰাইনাই ব্যক্তিগত কাৰণৰ বাবে আই পি এলৰ পৰা নাম প্ৰত্যাহাৰ কৰি ভাৰতলৈ উভতি আহে।
সুৰেশ ৰাইনাই বিগত ১৫ আগষ্টত মহেন্দ্ৰ সিং ধোনীৰ সৈতে একেদিনাই আন্তঃৰাষ্ট্ৰীয় ক্ৰিকেটৰ পৰা সন্যাস গ্ৰহণ কৰিছিল।