প্ৰফেট মহম্মদ বিতৰ্ক: নূপুৰ শৰ্মালৈ সমৰ্থন আগবঢ়ালে ৰাজ ঠাকৰেই

প্ৰফেট মহম্মদ সম্পৰ্কে বিতৰ্কিত মন্তব্য কৰি দেশৰ লগতে আন্ত:ৰাষ্ট্ৰীয় পৰ্যায়তো নিন্দাৰ সন্মুখীন হোৱা বিজেপিৰ নিলম্বিত মুখপাত্ৰ নূপুৰ শৰ্মাৰ সমৰ্থনত এইবাৰ থিয় দিছে মহাৰাষ্ট্ৰ নৱনিৰ্মাণ সেনাৰ মুৰব্বী ৰাজ ঠাকৰে।

এক সাক্ষাৎকাৰত নূপুৰ শৰ্মালৈ সমৰ্থন আগবঢ়াই ৰাজ ঠাকৰেই কয়, “সকলোৱে নূপুৰ শৰ্মাক ক্ষমা বিচাৰিবলৈ দাবী কৰিছে। কিন্তু আমি এই বিষয়ত নূপুৰ শৰ্মাক সমৰ্থন কৰিছো।”

নূপুৰ শৰ্মাই যি মন্তব্য কৰিছিল, তেনে অনুৰূপ মন্তব্য পূৰ্বে জাকিৰ নায়েকেও কৰিছিল বুলি সোঁৱৰাই দি ৰাজ ঠাকৰেই সেই সময়ত নায়েকৰ পৰা কোনেও ক্ষমাৰ দাবী কৰা কৰা নাছিল বুলি উল্লেখ কৰে।

উল্লেখ্য টেলিভিচনত সম্প্ৰচাৰিত এক অনুষ্ঠানত নূপুৰ শৰ্মাই পয়গম্বৰৰ ওপৰত কৰা মন্তব্যই সমগ্ৰ দেশতে প্ৰতিবাদৰ সৃষ্টি কৰিছিল। লগতে বিশ্বৰ মুছলমান প্ৰধান দেশসমূহৰ পৰাও ভাৰতৰ ওপৰত তীব্ৰ হেঁচা পৰিছিল।

এনে পৰিস্থিতিত বিজেপিয়ে পৰৱৰ্তী সময়ত নূপুৰ শৰ্মাক দলৰ পৰা নিলম্বিত কৰিছিল। যোৱা ১০ আগষ্টত উচ্চতম ন্যায়ালয়ে নূপুৰ শৰ্মাৰ বিৰুদ্ধে সমগ্ৰ দেশত দাখিল কৰা সকলো গোচৰ দিল্লী আৰক্ষীলৈ স্থানান্তৰ কৰে।

আনহাতে যোৱা মাহত শীৰ্ষ আদালতে নূপুৰ শৰ্মাৰ বিৰুদ্ধে দাখিল কৰা এজাহাৰৰ সন্দৰ্ভত ১০ আগষ্টলৈকে গ্ৰেপ্তাৰৰ পৰা অন্তৱৰ্তীকালীন সুৰক্ষা প্ৰদান কৰিছিল।

ইফালে ৰাজ ঠাকৰেই লগতে শিৱসেনাৰ নেতা তথা তেওঁৰ সম্পৰ্কীয় জেষ্ঠ ভাতৃ উদ্ধৱ ঠাকৰেকো সমালোচনাৰ লক্ষ্য কৰি লয়। ঠাকৰেই কয়, “যেতিয়া মই শিৱসেনাত আছিলো, বালাচাহেবে সিদ্ধান্ত লৈছিল যে যিদলৰ অধিক বিধায়ক আছে সেই দলেই মুখ্যমন্ত্ৰীৰ আসন লাভ কৰিব।”

বালাচাহেবৰ এই সিদ্ধান্তৰ পাছতো উদ্ধৱ ঠাকৰেই কিদৰে এই সিদ্ধান্ত সলনি কৰিব পাৰে বুলি প্ৰশ্ন কৰি ৰাজ ঠাকৰেই পৰোক্ষভাৱে বিজেপিলৈ সমৰ্থন আগবঢ়ায়।