শ্বিলঙত নিবনুৱা সমস্যা সমাধানৰ দাবীত হোৱা প্ৰতিবাদত হিংসাত্মক ৰূপ: কেইবাগৰাকীও আহত

বৰ্ধিত নিবনুৱা সমস্যা সমাধানৰ দাবীত চুবুৰীয়া ৰাজ্য মেঘালয়ৰ ৰাজধানী শ্বিলঙত আজি খাচী জয়ন্তীয়া আৰু গাৰো পিপ’ল ফেডাৰেচনৰ দ্বাৰা আয়োজিত এক প্ৰতিবাদী সমদলে হিংসাত্মক ৰূপ ধাৰণ কৰাৰ ফলত সংবাদ মাধ্যমৰ লোকসহ কেইবাগৰাকীও লোক আহত হয়।

মেঘালয়ত নিবনুৱাৰ তীব্ৰ বৃদ্ধিৰ ওপৰত সজাগতা বৃদ্ধিৰ উদ্দেশ্যে মটফ্ৰানৰ পৰা লাইতুমখৰাৰ অগ্নি নিৰ্বাপক বাহিনীৰ খেলপথাৰলৈ এই প্ৰতিবাদী সমদল উলিওৱা হৈছিল।

কিন্তু সমদলটোত অংশগ্ৰহণ কৰা একাংশ লোকে পথচাৰীক আক্ৰমণ কৰাৰ পিছতে ক্ৰমাৎ প্ৰতিবাদে হিংসাত্মক ৰূপ লয় বুলি অভিযোগ উঠিছে। এই হিংসাত্মক ঘটনাত বহুকেইগৰাকী লোক আহত হোৱাৰ লগতে কেইবাখনো বাহন ক্ষতিগ্ৰস্ত হয়।

প্ৰতিবাদকাৰীসকলে মেঘালয় আৰক্ষীৰ এখন বাহনতো আক্ৰমণ কৰি বাহনখনৰ অনিষ্ট সাধন কৰে। এই হিংসাত্মক ঘটনাৰ পাছতে সমদলটোৰ নিৰ্ধাৰিত পথচোৱাত যানবাহনৰ চলাচল স্থবিৰ হৈ পৰে।

ইফালে হিংসাৰ পিছত অঞ্চলটোৰ দোকান-পোহাৰ তথা ব্যৱসায়িক প্ৰতিষ্ঠানসমূহ দিনটোৰ বাবে বন্ধ কৰি দিয়া হয়।