সোণোৱালক আঁতৰোৱাৰ অভিযানত হিন্দুত্ববাদী ৰামসেনা
এক নাভূত নাশ্ৰুত কাণ্ড। সৰ্বানন্দ সোণোৱালক আঁতৰাই জ্যেষ্ঠ আৰ এছ এছ নেতা তথা বিজেপিৰ ৰাজ্যিক সাংগঠনিক সাধাৰণ সম্পাদক ফণীন্দ্ৰ নাথ শর্মাক অসমৰ মুখ্য মন্ত্ৰী পাতিব খুজিছে হিন্দুত্ববাদী সংগঠন ৰামসেনাই।
বিজেপিৰ পৰৱৰ্তী ৰাজ্যিক সভাপতি হ’ব বুলি ফনীন্দ্ৰ নাথ শৰ্মাৰ নাম চৰ্চিত হৈ থকাৰ মাজতে তেওঁক ৰাজ্যৰ মুখ্য মন্ত্ৰী কৰাৰ অভিযানত নামিছে সংগঠনটো।
শুকুৰবাৰে দিছপুৰ প্ৰেছ ক্লাৱত এক সংবাদমেল সম্বোধন কৰি সৰ্বানন্দ সোণোৱালক মুখ্য মন্ত্ৰী হিচাপে সম্পূৰ্ণ বিফল আখ্যা দিয়াৰ লগতে তেওঁৰ দিনতে ৰাজ্যত থলুৱা হিন্দুৰ সুৰক্ষা নাইকিয়া হৈছে বুলি গুৰুতৰ অভিযোগ তোলে।
‘বিজেপি নেতৃত্বাধীন চৰকাৰখনৰ মুৰব্বী তথা জাতীয় নায়ক খ্যাত মুখ্য মন্ত্ৰী সৰ্বানন্দ সোণোৱালৰ দিনতে অসমৰ থলুৱা হিন্দু লোকৰ সুৰক্ষা নাইকিয়া হৈছে। তেওঁৰ শাসন কালতেই লাভ জেহাদৰ দৰে ঘটনা দুগুণে বৃদ্ধি পাইছে। নামঘৰ, মন্দিৰত চুৰি কাৰ্য্য বৃদ্ধি পাইছে। চৰকাৰৰ কাৰ্য্যকাল শেষ হ’বৰ হ’ল সত্ৰৰ মাটি বে-দখল মুক্ত কৰিব নোৱাৰিলে।’ ৰামসেনাৰ প্ৰমুখ দেৱজিত ডেকাই সংবাদমেলত এইদৰে কয়।
এই অভিযোগ উত্থাপন কৰি তেওঁ লগতে কয় ‘সেয়েহে ভাৰতৰ আন আন ৰাজ্যৰ লেখীয়াকৈ অসমতো সংঘ পৰিবাৰৰ কোনো নিষ্ঠাৱান লোকক অসমৰ মুখ্য মন্ত্ৰী হিচাপে অধিষ্ঠিত কৰিব লাগে। এই এবছৰ সময়ছোৱাৰ ভিতৰত সংঘ পৰিবাৰৰ নিষ্ঠাৱান কৰ্মী তথা ৰাজ্যিক বিজেপিৰ মুখ্য সাংগঠনিক সম্পাদক ফণীন্দ্ৰ নাথ শৰ্মাক মুখ্য মন্ত্ৰী পাতিলে সকলো পৰ্য্যায়ৰ কৰ্মীৰ মাজত দুগুণ উৎসাহ বাঢ়িব।’
তাৎপৰ্য্যপূৰ্ণভাৱে, মুখ্য মন্ত্ৰী সোণোৱালক আঁতৰাই শৰ্মাক মুখ্য মন্ত্ৰী পতাৰ সমৰ্থনত কাইলৈৰ পৰা স্বাক্ষৰ অভিযান চলাব বুলি ডেকাই ঘোষণা কৰে।
‘কাইলৈৰ পৰা আমি এই সম্পৰ্কত sign campaigning কৰিম আৰু জনমত গঠন কৰিম। বিভিন্ন হিন্দুত্ববাদী সংগঠনে আমাক সহযোগ কৰিব বুলি ইতিমধ্যে কথা দিছে।” তেওঁ কয়।
তদুপৰি এই বিষয় লৈ প্ৰধান মন্ত্ৰী নৰেন্দ্ৰ মোদীলৈ স্মাৰক পত্ৰ প্ৰেৰণ কৰাৰ সিদ্ধান্ত লোৱা বুলি ঘোষণা কৰে ৰামসেনাই।