দুবাৰকৈ ধৰ্ষণৰ বলি হোৱা মহিলাৰ এজাহাৰ দাখিলৰ পাছতো নিৰ্বিকাৰ আৰক্ষী

আন্তৰ্জাতিক নাৰী দিৱস উদযাপন তথা নাৰীৰ নিৰাপত্তাৰ বাবে চৰকাৰে বিভিন্ন আঁচনি গ্ৰহণ কৰাৰ সময়তে গোৱালপাৰাত এগৰাকী ধৰ্ষণৰ বলি হোৱা মহিলাই ন্যায়ৰ অপেক্ষাত সময় পাৰ কৰিব লগীয়া হৈছে। যিহেতু ভুক্তভোগী মহিলাগৰাকীয়ে আৰক্ষী থানাত এজাহাৰ দাখিল কৰাৰ পিছতো আৰক্ষীয় বৰ্তমানলৈকে কোনো পদক্ষেপ গ্ৰহণ কৰা নাই।

ঘটনাটো আগিয়া আৰক্ষী চকীৰ অধীনৰ ডৰাপাৰা গাঁৱত মেট্ৰিক পৰীক্ষা চলি থকাৰ সময়ত সংঘটিত হৈছিল। লখিপুৰ আৰক্ষী চকীৰ অধীনৰ মালধৰা গাঁৱৰ মহিলাগৰাকীৰ জীয়েক আগিয়া পৰীক্ষা কেন্দ্ৰত মেট্ৰিক পৰীক্ষা দিয়াৰ কথা আছিল। সেই উদ্দেশ্যে মহিলাগৰাকীয়ে ডৰাপাৰা গাঁৱৰ অজয় নাথ ওৰফে অজিত নাথৰ ঘৰত এটা ঘৰ কিছুদিনৰ কাৰণে ভাড়ালৈ লয়।

জানিব পৰা মতে ভাড়াঘৰৰ মালিক অজয় নাথ বিবাহিত হোৱাৰ লগতে পঞ্চায়ত আৰু গ্ৰামোন্নয়ন বিভাগৰ গ্ৰাম সেৱক। এজাহাৰত ভুক্তভোগী মহিলাগৰাকীয়ে উল্লেখ কৰা মতে অজয় নাথে নিজৰ পত্নী ঘৰত নথকাৰ সুযোগ গ্ৰহণ কৰি ১৩ ফেব্ৰুৱাৰিত প্ৰায় ১১ বজাত মহিলাগৰাকীক ধৰ্ষণ কৰে।

ধৰ্ষণৰ বলি হোৱা মহিলাগৰাকীয়ে নিজৰ জীয়েকৰ পৰীক্ষা চলি থকাৰ বাবে ঘটনা সন্দৰ্ভত নিশ্চুপ হৈ থাকে। কিন্তু লম্পট তথা অভিযুক্ত অজয় নাথে পুনৰ ২৬ ফেব্ৰুৱাৰিত মহিলাগৰাকীক ধৰ্ষণ কৰে। আৰু চোকা অস্ত্ৰৰে ভাবুকি প্ৰদৰ্শন কৰি নিজকে আগিয়া অঞ্চলৰ ‘বাঘ’ বুলি কোৱাৰ লগতে আৰক্ষীৰ লগতো সু-সম্পৰ্ক থকা বুলি কয়।

ইফালে ভুক্তভোগী মহিলাগাৰকীয়ে নিজৰ জীয়ৰেকৰ স্বাৰ্থত মনে মনে আছিল যদিও পৰীক্ষা শেষ হোৱাৰ  লগে লগে মাৰ্চৰ প্ৰথম সপ্তাহতে আগিয়া আৰক্ষী চকীত ঘটনা সন্দৰ্ভত এজাহাৰ দাখিল কৰে।

এজাহাৰত মহিলাগৰাকীয়ে অজয় নাথে ধৰ্ষণ কৰা বুলি স্পষ্টভাৱে উল্লেখ কৰিছে। কিন্তু মন কৰিবলগীয়া যে ১৭ মাৰ্চলৈকে অভিযুক্ত তথা লম্পট অজয় উক্ত অঞ্চলত মুক্তভাৱে ঘূৰি ফুৰিছে।