কাজিৰঙা ৰাষ্ট্ৰীয় উদ্যানৰ বনকৰ্মী ডিম্বেশ্বৰ দাসলৈ ৰয়েল বেংক অৱ স্কটলেণ্ডৰ ‘আৰ্থ হিৰো ২০১৯’ বঁটা

কাজিৰঙা ৰাষ্ট্ৰীয় উদ্যানৰ বনকৰ্মী ডিম্বেশ্বৰ দাসে ৰয়েল বেংক অৱ স্কটলেণ্ডৰ আৰ বি এছ ফাউণ্ডেশ্যনৰ দ্বাৰা প্ৰদান কৰি অহা ‘আৰ বি এছ আৰ্থ হিৰো ২০১৯’ লাভ কৰিবলৈ সক্ষম হয়।

সুদীৰ্ঘ দিন কাজিৰঙা ৰাষ্ট্ৰীয় উদ্যানৰ বাবে আগবঢ়োৱা নিজৰ ত্যাগ আৰু সেৱাৰ বাবে সন্মানীয় ‘আৰ বি এছ আৰ্থ হিৰো ২০১৯’ লাভ কৰিবলৈ সক্ষম হোৱা ডিম্বেশ্বৰ দাসৰ ঘৰ বোকাখাতৰ জাপৰি পথাৰত ৷

বিগত ২০ টা বছৰেই তেওঁ কাজিৰঙাৰ বনকৰ্মী হিচাপে কৰ্মৰত। একেধাৰে ৰাইফল চলোৱা, নাও চলোৱা, গাড়ী চলোৱাকে ধৰি সকলো কামতে পাৰ্গত ডিম্বেশ্বৰ দাস কাজিৰঙাৰ এজন নিষ্ঠাবান কৰ্মী।

আৰ বি এছ ফাউণ্ডেচনে গ্ৰীণ ৱাৰিঅ’ৰ শিতানত ডিম্বেশ্বৰ দাসলৈ এই সন্মানীয় বঁটা প্ৰদান কৰে। ডিম্বেশ্বৰ দাসে লাভ কৰা আৰ্থ হিৰো বঁটাই উৎফুল্লিত কৰিছে কাজিৰঙাক।

ভাৰতত থকা ৰয়েল বেংক অৱ স্কটলেণ্ডৰ আৰ বি এছ ফাউণ্ডেশ্যনৰ দ্বাৰা প্ৰদান কৰি অহা ‘আৰ বি এছ আৰ্থ হিৰো পুৰস্কাৰ ২০১৯’ মঙলবাৰে নতুন দিল্লীত প্ৰদান কৰা হয়।

প্ৰকৃতি সংৰক্ষণ আৰু জলবায়ু প্ৰতিহত কৰাৰ বাবে আগবঢ়োৱা অনবদ্য সেৱাৰ বাবে দেশৰ সাত ব্যক্তিক ২০১৯ বৰ্ষৰ নৱম আৰ্থ হিৰো বঁটা পাচঁটা বিশেষ শিতানত প্ৰদান কৰা হয় ৷ দেশৰ সাত জন ব্যক্তিৰ লগতে কাজিৰঙা ৰাষ্ট্ৰীয় উদ্যানৰ বনকৰ্মী ডিম্বেশ্বৰ দাসো নৱম আৰ বি এছ আৰ্থ হিৰো পুৰস্কাৰৰ বাবে নিৰ্বাচিত হয় ৷

আৰ বি এছ ফাউণ্ডেচনৰ দ্বাৰা আয়োজিত এই বঁটা প্ৰদান অনুষ্ঠানত কেন্দ্ৰীয় গৃহ মন্ত্ৰালয়ৰ ৰাজ্যিক মন্ত্ৰী কিষণ ৰেড্ডী, পৰিৱেশ, বন আৰু জলবায়ু পৰিৱৰ্তন মন্ত্ৰালয়ৰ কেন্দ্ৰীয় ৰাজ্যিক মন্ত্ৰী বাবুল সুপ্ৰিয়কে ধৰি বিভিন্ন গণ্য-মান্য ব্যক্তি উপস্থিত থাকে ৷