জাতিৰ হকে কাইলৈ এঘাৰ বজাত লতাশিললৈ আহক; জুবিনৰ আহ্বান

গুৱাহাটী মহানগৰীৰ লতাশিল খেলপথাৰত কাইলৈ অৰ্থাৎ ১২ ডিচেম্বৰৰ দিনৰ ১১ বজাত জুবিন গাৰ্গৰ আহ্বানত কেব বিৰোধী সমাৱেশ অনুষ্ঠিত হ’ব।

জুবিনে এক ফে’চবুক প’ষ্টৰ জৰিয়তে সকলোকে এই সমাৱেশত উপস্থিত হ’বলৈ আহ্বান জনায়।

প’ষ্টটোত তেওঁ কয়, ‘জাতিৰ হকে কাইলৈ এঘাৰ বজাত লতাশিললৈ আহক৷ অলপ পাছত ইণ্টাৰনেট বন্ধ হৈ যাব৷ তাৰ আগতেই এই সংবাদ বিয়পাই দিয়ক৷ যিমান বেয়া হ’ব পাৰে, সময় সিমান বেয়া হৈ গৈছে৷ আৰু ৰৈ নাথাকিব৷ শান্তি-শৃংখলা বজাই ৰাখি কাইলৈ লতাশিলত উপস্থিত হওক৷ এইবাৰ ওফৰাই পেলাব লাগিব৷’

আছুৰ উপদেষ্টা সমুজ্জ্বল ভট্টাচাৰ্যয়ো জুবিন গাৰ্গৰ আহ্বানৰ প্ৰতি সঁহাৰি জনাইছে। ভট্টাচাৰ্যই কয়, ‘কাইলৈ দিনৰ ১১ বজাত সকলো লতাশিললৈ আহক। আমি সকলো সমবেত হম।‘

‘জুবিন গাৰ্গৰ লগতো আমি আলোচনা কৰিছোঁ। সান্ধ্য আইন জাৰি থাকিলেও আমি একগোট হম আৰক্ষীয়ে যাতে বিধি-পঠালি নিদিয়ে।‘ তেওঁ লগতে কয়।