জীয়াজুৰি চাহ বাগিছাত উদ্ধাৰ কৰা ৰজা ফেটি চোৱাং বনাঞ্চলত মুকলি কৰি দিলে প্ৰকৃতিপ্ৰেমীয়ে

নগাঁও জিলাৰ চাপানালাৰ প্ৰকৃতিপ্ৰেমী যুৱক বিনোদ দুলু বৰাই শুকুৰবাৰে বিয়লি ভাগত উদ্ধাৰ কৰে এডাল বৃহৎ আকৃতিৰ ৰজা ফেটি সাপ।

নগাঁও-কাৰ্বি আংলং সীমান্তৱৰ্তী জীয়াজুৰি চাহ বাগানত শ্ৰমিক সকলে কাম কৰি থকা অৱস্থাত বৃহৎ আকৃতিৰ সাপডাল দেখি হুৱা-দুৱা লগায়। পাছত ঘটনাৰ খৱৰ পাই প্ৰায় ১৪ফুট দৈৰ্ঘ্যৰ সাপ ডাল স্থানীয় প্ৰকৃতিপ্ৰেমী যুৱক বিনোদ দুলু বৰাই সাহসিকতাৰে উদ্ধাৰ কৰিবলৈ সক্ষম হয়।

পৰৱৰ্তী সময়ত বিৰল প্ৰজাতিৰ ৰজা ফেঁটি সাপ ডাল দুলু বৰাই পত্নীৰ সহযোগত নগাঁৱৰ চাপানালাৰ নিকটৱৰ্ত্তী চোৱাং সংৰক্ষিত বনাঞ্চলত মুক্ত কৰি দিয়ে বুলি জানিব পৰা গৈছে।

উল্লেখযোগ্য যে, ২০১৪ বৰ্ষত “চেঞ্চুৰী এছিয়া ৱাইল্ড লাইফ চাৰ্ভিচ এৱাৰ্ড” প্ৰাপক বিনোদ দুলু বৰাই বৰ্তমানলৈকে ২০ডাল ৰাজ ফেঁটি সহ প্ৰায় ৬০০-ৰো অধিক বিভিন্ন প্ৰজাতিৰ সাপ সংকটজনক পৰিস্থিতিৰ পৰা উদ্ধাৰ কৰিবলৈ সক্ষম হৈছে।

দীৰ্ঘদিন ধৰি নগাঁও-কাৰ্বিআংলং সীমান্তৱৰ্তী বৃহত্তৰ অঞ্চলটোত বন্যহস্তী আৰু মানুহৰ মাজৰ সংঘাত দূৰ কৰাৰ প্ৰচেষ্টা চলাই থকা দুলু বৰাই এতিয়ালৈকে প্ৰায় ৬০০০-ৰো অধিক বন্যপ্ৰাণী বিভিন্ন অস্বাভাৱিক পৰিস্থিতিৰ পৰা উদ্ধাৰ কৰি চোৱাং সংৰক্ষিত বনাঞ্চলত তথা তাৰ আশেপাশে মুক্ত কৰি দিবলৈ সক্ষম হৈছে।

অৱশ্যে মুক্ত কৰি দিয়াৰ পূৰ্বে যুৱক জনে উদ্ধাৰ কৰা বন্যপ্ৰাণী সমূহৰ প্ৰাথমিক স্বাস্থ্য পৰীক্ষা কৰোৱাৰ লগতে প্ৰয়োজন হ’লে কিছু দিনৰ বাবে চিকিৎসা প্ৰদান তথা তদাৰক কৰিবৰ বাবে উচিত সংৰক্ষণৰো ব্যৱস্থা কৰি আহিছে।

ইপিনে, বহু সৰুৰে পৰা জীৱ-জন্তুৰ সৈতে জড়িত হৈ পৰা প্ৰকৃতিপ্ৰেমী যুৱক বিনোদ দুলু বৰাক সদ্য বিবাহিতা পত্নী মেঘ্না বৰাই সম্প্ৰতি বন্যপ্ৰাণী উদ্ধাৰ আৰু সংৰক্ষণৰ ক্ষেত্ৰত সকলোবোৰ কামতে ওতঃপ্ৰোত ভাবে জড়িত থাকি সহযোগিতা আগবঢ়াই অহা পৰিলক্ষিত হৈছে। ইয়াৰ বাবে কেৱল প্ৰকৃতিপ্ৰেমী সকলৰ মাজতে নহয়, সমগ্ৰ নগাঁও বাসীৰ মাজতে এক চৰ্চাৰ বিষয় হৈ পৰিছে এইহাল দাম্পতি।