মাটিৰ তলতো ফুলে ধুনীয়া সুগন্ধি অৰ্কিড, ক’ত ফুলে এনে অৰ্কিড?

মাটিৰ তলতো ফুল ফুলে!

কথাষাৰ শুনিবলৈ অবিশ্বাস্য যেন  লাগিলেও এনে ফুলৰ ফুলনিও আছে এই পৃথিৱীতে।

ব’হাগ আহিলে অসম তথা উত্তৰ-পূৰ্বাঞ্চলত ডাল ভৰি ভৰি কপৌ ফুল ফুলে।কপৌৰ লগতে আন বহু প্ৰজাতিৰ অৰ্কিডৰ বাবে উত্তৰ-পূৰ্বাঞ্চল সমগ্ৰ বিশ্বতে পৰিচিত।

নানাৰঙী অৰ্কিডবোৰ কেৱল গছৰ ডালতে ফুলি থকা দেখা যায় যদিও মাটিৰ তলতো কোনেও নেদেখা কৈ এবিধ ধুনীয়া অৰ্কিড এই প্ৰকৃতিতে ফুলি আহিছে।

মাটিৰ তলত ফুলা এই অৰ্কিড বিধ অতি সুগন্ধি হয়।

মাটিৰ তলত সকলোৰে অগোচৰে ফুলা অৰ্কিড বিধৰ নাম ৰাইজেনথেলা গাৰ্ডনেৰী( Rhizanthella gardneri)।

পশ্চিম অষ্ট্ৰেলিয়াৰ মাটিৰ তলত ফুলা এই ধুনীয়া ফুলপাহৰ কথা ১৯২৮ চনলৈকে কোনেও জনাই নাছিল।

১৯২৮ চনৰ কোনোৱা এটা দিনত পশ্চিম অষ্ট্ৰেলিয়াৰ জেক ট্ৰট নামৰ লোকজনে তেওঁৰ পথাৰৰ এঠাইত মাটি চিৰাল ফাঁট দি থকা দেখিবলৈ পাই মাটি খান্দি ফুলপাহ আৱিষ্কাৰ কৰিবলৈ সক্ষম হয়।

তেতিয়াৰে পৰা জনা যায় যে পশ্চিম অষ্ট্ৰেলিয়াৰ ভূ-গৰ্ভত আছে এনে অৰ্কিডৰ ফুলনি।

প্ৰায় ৩ চেণ্টিমিটাৰ দীঘল এই ফুলে বিশ্বৰ প্ৰকৃতিবিদ সকলৰ দৃষ্টি কাঢ়ি আহিছে।

১৯৯৭ চনত এই ফুলক দুস্প্ৰাপ্য প্ৰজাতিৰ ফুলৰ তালিকাত অন্তৰ্ভূক্ত কৰা হয়।

প্ৰতি বছৰৰ মে’-জুন মাহত মাটিৰ তলত অসংখ্য ৰাইজেনথেলা গাৰ্ডনেৰী ফুল ফুলি উঠে।