কলিয়াবৰত পুনৰ পথ দুৰ্ঘটনা; বেলেন’ৰ খুন্দাত প্ৰাণ গ’ল এজনৰ

এটাৰ পিছত আনটো সংঘটিত হ’বলৈ ধৰা পথ দুৰ্ঘটনাই এতিয়া কলিয়াবৰ অঞ্চলৰ ৰাইজৰ মাজত ত্ৰাসৰ সৃষ্টি কৰিছে।
বুধবাৰে সন্ধিয়া কলিয়াবৰৰ নলতলিত পথ দুৰ্ঘটনা সংঘটিত হৈ এগৰাকী মহিলাই প্ৰাণ হেৰুৱাৰ কেই ঘণ্টামানৰ পিছতে নিশা সংঘটিত আন এক দুৰ্ঘটনাত পুনৰ এজন লোক নিহত হয়।

প্ৰাপ্ত তথ্য মতে কলিয়াবৰৰ হাটবৰত নিশা এখন দ্ৰুতবেগী মাৰুতি বেলেন’ গাড়ীয়ে মহতিয়াই নিয়াত মুকুল শইকীয়া (৫০) নামৰ হাটবৰ, বৰিগাঁৱৰ নিবাসী লোকজনে থিতাতে প্ৰাণ হেৰুৱায়।

স্থানীয় ৰাইজে জানিবলৈ দিয়া অনুসৰি এ এছ ১২ এক্স ৩১৫৮ নম্বৰৰ মাৰুতি বেলেন’খনৰ চালকে নিয়ন্ত্ৰণ হেৰুৱাই খোজৰে গৈ থকা মুকুল শইকীয়াক প্ৰচণ্ড জোৰত খুন্দা মাৰে।

দুৰ্ঘটনাৰ খবৰ পাই জখলাবন্ধা আৰক্ষী ঘটনাস্থলীত উপস্থিত হৈ স্থানীয় ৰাইজৰ সহযোগত তেওঁক জখলাবন্ধা চিকিৎসালয়লৈ লৈ যায় যদিও চিকিৎসকে লোকজনক মৃত ঘোষণা কৰে। পিছত তেওঁক মৰণোত্তৰ পৰীক্ষাৰ বাবে নগাঁও চিকিৎসালয়লৈ প্ৰেৰণ কৰা হয়।

আনহাতে আৰক্ষীয়ে দুৰ্ঘটনা সংঘটিত কৰা গাড়ীখন জব্দ কৰাৰ লগতে চালকজনকো আটক কৰে বুলি জানিব পৰা গৈছে।