আন্তঃৰাষ্ট্ৰীয় বক্সাৰ ভাগ্যৱতী কছাৰীৰ আৱাসত চুৰি; চোৰে নিলে ২০ টাৰো অধিক সোণ আৰু ৰূপৰ পদক

বিভিন্ন ৰাষ্ট্ৰীয় আৰু আন্তঃৰাষ্ট্ৰীয় বক্সিং প্ৰতিযোগিতাত পদক অৰ্জন কৰি অসম তথা দেশলৈ গৌৰৱ কঢ়িয়াই অনা অসমৰ প্ৰতিভাৱান মহিলা বক্সাৰ ভাগ্যৱতী কছাৰীৰ মালিগাঁওস্থিতি আৱাসগৃহত শুকুৰবাৰে নিশা চোৰে উপদ্ৰৱ চলায়।

শুকুৰবাৰে নিশাৰ ভাগত মালিগাঁৱৰ ৰেলৱে কলনিত অৱস্থিত ভাগ্যৱতী কছাৰীৰ আৱাসগৃহত কোনো নথকাৰ সুযোগ লৈ চোৰে প্ৰৱেশ কৰি খেলুৱৈগৰাকীয়ে লাভ কৰা পদক, জোতা, খেলৰ সামগ্ৰীকে ধৰি এল ই ডি টিভি সামগ্ৰী লৈ উধাও হয়।

মালিগাঁও ৰেলৱে কলনিৰ ৩৩ নং আৱাসত থকা ভাগ্যৱতী কছাৰীৰ আৱাসত নিশা চোৰে দৰ্জা ভাঙি প্ৰৱেশ কৰে।

আনহাতে, চোৰে খেলুৱৈগৰাকীয়ে লাভ কৰা ২০ টাৰো অধিক সোণ আৰু ৰূপৰ পদক চুৰি কৰি নিয়ে বুলি জানিব পৰা গৈছে।

উল্লেখযোগ্য যে, অসমৰ আন্তঃৰাষ্ট্ৰীয় মহিলা বক্সাৰগৰাকীয়ে বৰ্তমান দিল্লীত প্ৰস্তুতি চলাই আছে।

অসমৰ তাৰকা বক্সাৰ লাভলিনা বৰগোহাঁইৰ লগতে ভাগ্যৱতী কছাৰীও টকিঅ’ অলিম্পিকলৈ যোগ্যতা অৰ্জনৰ বাবে প্ৰস্তুতি অব্যাহত ৰাখিছে।