মাইলষ্ট’ন এলাৰ্ট! ৰোহিত শৰ্মাৰ সমুখত শচীন, পণ্টিং, গাংগুলীক অতিক্ৰমৰ সুযোগ
আজিৰ পৰা আৰম্ভ হ’ব ঘৰুৱা দল ৱেষ্ট ইণ্ডিজৰ বিপক্ষে ভ্ৰমণকাৰী ভাৰতৰ তিনিখনীয়া এদিনীয়া মেচৰ দ্বিপাক্ষিক শৃংখলা। এই শৃংখলাটোত ভাৰতীয় দলৰ অধিনায়ক তথা অপেনাৰ ৰোহিত শৰ্মাই এক ঈৰ্ষণীয় মাইলষ্ট’ন সম্পূৰ্ণ কৰাৰ সুযোগ লাভ কৰিছে।
নিম্নক্ৰমৰ বেটিং স্থানৰ পৰা দলৰ অপেনিং বেটাৰলৈ উন্নীত হোৱাৰ পিছৰে পৰাই ৰোহিত শৰ্মা ভাৰতীয় দলৰ বেটিং লাইন আপৰ অন্যতম মুখ্য হোতা হিচাপে পৰিগণিত হৈ আহিছে। সুদৃঢ় আৰম্ভণিৰে দলক এক শক্তিশালী স্থিতিত উপনীত কৰোৱাত ৰোহিতে গ্ৰহণ কৰি আহিছে এক গুৰুত্বপূৰ্ণ ভূমিকা।
আক্ৰমণাত্মক শৈলীৰে ইনিংছ দীঘলীয়া কৰাত সিদ্ধহস্ত ৰোহিত শৰ্মাই আজিৰ পৰা আৰম্ভ হ’বলগীয়া শৃংখলাত এদিনীয়া কেৰিয়াৰত ১০,০০০ ৰান সম্পূৰ্ণ কৰাৰ সুযোগ লাভ কৰিব। এইপৰ্যন্ত তাৰকা বেটাৰগৰাকীয়ে এদিনীয়াত ৯৮২৫ ৰান সংগ্ৰহ কৰিছে।
এদিনীয়া আন্ত:ৰাষ্ট্ৰীয়ত ১০ হাজাৰ ৰান সম্পূৰ্ণ কৰিবলৈ ৰোহিত শৰ্মাক মাত্ৰ ১৭৫ ৰানৰ প্ৰয়োজন। ৱেষ্ট ইণ্ডিজৰ বিপক্ষে তাৰকাগৰাকীয়ে এই মাইলষ্ট’ন সম্পূৰ্ণ কৰিলে ক্ৰিকেট কিংবদন্তী শচীন টেণ্ডুলকাৰৰ লগতে সৌৰভ গাংগুলী আৰু ৰিকি পণ্টিঙৰ দৰে তাৰকাক অতিক্ৰম কৰিবলৈ সক্ষম হ’ব।
ক্ৰিকেট ইতিহাসৰ এই মহাতাৰকাসকলক অতিক্ৰম কৰিব পাৰিলে হিটমেন খ্যাত ৰোহিত শৰ্মা আন্ত:ৰাষ্ট্ৰীয় এদিনীয়া ক্ৰিকেটত এই মাইলষ্ট’ন সম্পূৰ্ণ কৰা দ্বিতীয় দ্ৰুততম খেলুৱৈ হিচাপে কৃতিত্ব কৰিব।
এই তালিকাত শীৰ্ষস্থানত আছে ভাৰতৰ তাৰকা খেলুৱৈ তথা সাম্প্ৰতিক ক্ৰিকেট বিশ্বৰ অন্যতম শ্ৰেষ্ঠ ক্ৰিকেটাৰ বিৰাট কোহলী। কোহলীয়ে মাত্ৰ ২০৫ ইনিংছত এদিনীয়া ক্ৰিকেটত ১০ হাজাৰ ৰান সম্পূৰ্ণ কৰিছিল।
কোহলীৰ পিছত তালিকাৰ দ্বিতীয়, তৃতীয় আৰু চতুৰ্থ স্থানত আছে ক্,মে টেণ্ডুলকাৰ, গাংগুলী, পণ্টিং। প্ৰাক্তন তাৰকা ক্ৰিকেটাৰকেইগৰাকীয়ে ক্ৰমে ২৫৯, ২৬৩, আৰু ২৬৬ ইনিংছত ১০ হাজাৰ ৰানৰ সীমা স্পৰ্শ কৰিছিল।
উল্লেখ্য যে, ৰোহিত শৰ্মাই বৰ্তমানলৈকে এদিনীয়া ক্ৰিকেটত ২৩৬টা ইনিংছ খেলিছে। ১০,০০০ ৰানৰ দ্ৰুততম খেলুৱৈৰ তালিকাত ৰোহিতে কোহলীক অতিক্ৰম কৰা সম্ভৱ নহ’লেও দ্বিতীয় স্থান দখলৰ বাবে হিটমেন ৰোহিতৰ হাতত আছে পৰ্যাপ্ত সুযোগ।