বিশ্বক কৰ’নামুক্ত কৰি তোলাৰ পথ দেখুৱাব ৰাছিয়াই; দাবী পুটিনৰ
বিশ্বৰ প্ৰথম কৰ’নাভাইৰাছৰ ভেকচিন আনিবলৈ সাজু হৈছে ৰাছিয়া। বুধবাৰে বহু অপেক্ষিত কৰ’নাৰ ভেকচিন মুকলি কৰিবলৈ আগবাঢ়িছে দেশখনে।
ৰাছিয়াই দাবী কৰিছে যে দেশখনে প্ৰস্তুত কৰি উলিওৱা এই ভেকচিনৰ জৰিয়তে কৰ’নাৰ বিৰুদ্ধে প্ৰতিৰোধ গঢ়ি তুলিব পৰা যাব।
মঙলবাৰে ৰাছিয়াৰ ৰাষ্ট্ৰপতি ভ্লাডিমিৰ পুটিনে ছচিয়েল মিডিয়াৰ জৰিয়তে জানিবলৈ দিয়ে যে কোভিড-১৯ৰ ভেকচিন আৱিষ্কাৰৰ দিশত দেশখনৰ বিজ্ঞানীসকলে ইতিমধ্যে পৰীক্ষা-নিৰীক্ষা সকলো স্তৰ অতিক্ৰম কৰিছে।
তেওঁ কয় যে বিজ্ঞানীসকলে প্ৰমান কৰিছে যে এই ভেকচিন কাৰ্যকৰী হোৱাৰ লগতে নিৰাপদ।
ৰাষ্ট্ৰপতি পুটিনে লগতে কয় যে আমাৰ এই ভেকচিন কৰ’নাৰ বিৰুদ্ধে অতি কাৰ্যকৰী আৰু ই কেবল ৰাছিয়াৰ বাবেই নহয়, সমগ্ৰ বিশ্বৰ বাবে আশা জগাই তুলিছে।
তেওঁ আশা কৰে যে এসময়ত ছোভিয়েট য়ুনিয়নৰ ছেটেলাইটেই মানৱ জাতিক মহাকাশলৈ লৈ গৈছিল আৰু এইবাৰ ৰাছিয়াৰ ভেকচিনে কৰ’নামুক্ত বিশ্বৰ পথ দেখুৱাব।
আনহাতে, ৰাছিয়াৰ স্বাস্থ্য মন্ত্ৰী অ’লেগ গ্ৰীডনেভে জানিবলৈ দিয়ে যে ১২ আগষ্ট, বুধবাৰে আনুষ্ঠানিকভাৱে দেশখনৰ ভেকচিনৰ পঞ্জীয়ন কৰা হ’ব।
ভেকচিনটো মানুহৰ শৰীৰত নিৰাপদ হয়নে নাই তাৰ পৰীক্ষা ইতিমধ্যে সম্পন্ন কৰা হৈছে।
ইপিনে, ৰাছিয়াই চলিত বৰ্ষতে ৪.৫কোটি এই ভেকচিন প্ৰস্তুত কৰিব বুলি জানিব দিছে।