ক’ভিদত আক্ৰান্ত প্ৰবীণ গায়িকা সন্ধ্যা মুখাৰ্জী, চিকিৎসালয়ত ভৰ্তি

ক’ভিদত আক্ৰান্ত হৈছে বংগৰ প্ৰবীণ গায়িকা সন্ধ্যা মুখাৰ্জী। গায়িকা গৰাকীৰ শৰীৰত ক’ভিদৰ উপস্থিতি ধৰা পৰাৰ পিছত এখন ব্যক্তিগত চিকিৎসালয়ত ভৰ্তি কৰোৱা হৈছে।

৯০ বছৰীয়া গায়িকা গৰাকীক হৃদযন্ত্ৰ আৰু হাঁওফাঁও সম্পৰ্কীয় জটিলতাৰ বাবে কলকাতা আৰক্ষীয়ে সৃষ্টি কৰা সেউজ কৰিডৰৰ জৰিয়তে বৃহস্পতিবাৰে এছএছকেএম চিকিৎসালয়লৈ লৈ যোৱা হৈছিল।

চিকিৎসালয়ত উপস্থিত হোৱাৰ পিছত কৰা এক আৰটি-পিচিআৰ পৰীক্ষাত তেওঁৰ শৰীৰত ক’ভিদ পজিটিভ ধৰা পৰে। তেওঁ চিকিৎসাধীন হৈ থকা এছেছকেএম চিকিৎসালয়খন ক’ভিদ সমৰ্পিত চিকিৎসালয় নহয় বাবে মুখাৰ্জীক সন্ধিয়া এখন ব্যক্তিগত চিকিৎসালয়লৈ স্থানান্তৰ কৰা হৈছিল।

উল্লেখ্য যে যোৱা মঙ্গলবাৰে গৃহ মন্ত্ৰালয়ে ঘোষণা কৰা ২০২২ বৰ্ষৰ পদ্মশ্ৰী সন্মানৰ বাবে সন্ধ্যা মুখাৰ্জীৰ নাম বিবেচনা কৰিছিল। কিন্তু প্ৰবীণ গায়িকা গৰাকীয়ে এই সন্মান প্ৰত্যাখ্যান কৰে।

স্মৰ্তব্য যে ১৯৭২ চনৰ জানুৱাৰী মাহত বাংলাদেশৰ প্ৰতিষ্ঠাপক পিতৃ শ্বেখ মুজিবুৰ ৰহমান কাৰাগাৰৰ পৰা মুকলি হোৱাৰ পিছত “বঙ্গবন্ধু ফিৰে বালো তোমাৰ, স্বপ্নাৰ স্বধিন বাংলাই” গীতটোৱে তেওঁক আদৰণি জনোৱা হৈছিল। এই বিখ্যাত গীতটোত কণ্ঠদান কৰিছিল সন্ধ্যা মুখাৰ্জীয়ে।

এই গীতটি বহু সংখ্যক লোকৰ দুখ-কষ্ট আৰু ত্যাগৰ এক শান্ত আৰু আৱেগিক স্মাৰক আছিল। মুখাৰ্জীৰ কণ্ঠত প্ৰাণ পাই উঠা গীতটিয়ে কেৱল মুক্তি বাহিনীৰ সৈনিকসকলক অনুপ্ৰাণিত কৰাই নহয়, লগতে মানুহৰ হৃদয় আৰু মনত দেশপ্ৰেমৰ উৎসাহ সৃষ্টি কৰি সাধাৰণ মানুহক একত্ৰিত কৰাত এক গুৰুত্বপূৰ্ণ ভূমিকা পালন কৰিছিল।

প্ৰবীণ গায়িকা গৰাকী কালি চিকিৎসাধীন হোৱাৰ পিছত পশ্চিম বংগৰ মুখ্যমন্ত্ৰী মমতা বেনাৰ্জীয়ে চিকিৎসালয় ভ্ৰমণ কৰি তেওঁৰ স্বাস্থ্যৰ বুজ লয়।