টি-২০ ক্ৰিকেটত কোন হ’ব ভাৰতীয় দলৰ অধিনায়ক? বিচিচিআইত নতুন চৰ্চা!
বিশ্বকাপ জয় কৰি আন্তঃৰাষ্ট্ৰীয় টি-২০ ক্ৰিকেটৰ পৰা অৱসৰ গ্ৰহণ কৰিছে ৰোহিত শৰ্মাই। সেই তালিকাত বিৰাট কোহলী আৰু ৰবীন্দ্ৰ জাদেজায়ো নাম লিখিছে। গতিকে ভৱিষ্যতে দলটোৰ অধিনায়ক কোন হ’ব সেই লৈ বিচিচিআইৰ স্থিতিয়ে অলপ বিভ্ৰান্তিৰ সৃষ্টি কৰিছে।
স্বাভাৱিকতে প্ৰশ্ন উত্থাপন হৈছে যে এতিয়া টি-২০ ক্ৰিকেটত দেশক কোনে আগুৱাই নিব? বিশ্বজয়ৰ আঁৰত হাৰ্দিক পাণ্ডিয়াই ডাঙৰ ভূমিকা পালন কৰিছিল। সেই ক্ষেত্ৰত তেওঁৰ নামো পৰৱৰ্তী অধিনায়ক হিচাপে আগবাঢ়ি আহিছিল।
কিন্তু সূত্ৰৰ জৰিয়তে জনা গৈছে যে তেওঁক ৰোহিতৰ উত্তৰাধিকাৰী হিচাপে দায়িত্ব দিয়া হ’ব নে নহয়, তাক লৈ বিচিচিআই অলপ দ্বিধাগ্ৰস্ততাৰ মাজত আছে। আই পি এলত গুজৰাট টাইটানছৰ হৈ ট্ৰফী লাভ কৰিছিল হাৰ্দিক পাণ্ডিয়াই। কিন্তু মুম্বাইলৈ উভতি অহাৰ পিছত তেওঁ পুনৰ ব্যৰ্থ হয়।
লগতে পঢ়কঃ চন্দ্ৰৰ মাটিত ৰহস্যময় গুহাৰ সন্ধান! বিজ্ঞানী মহলত আলোড়নৰ সৃষ্টি কৰিছে এই আৱিষ্কাৰে
সেই পৰিস্থিতিৰ পৰা উভতি অহাৰ পাছত হাৰ্দিক পাণ্ডিয়াই বিশ্বকাপত অতি সুন্দৰ প্ৰদৰ্শন আগবঢ়ায়। আনকি, বিশ্বকাপৰ ফাইনেলৰ শেষ অভাৰত তেওঁ ভাৰতক বলিং কৰি মেচখন জয়ী কৰিছিল। কিন্তু শুনা যায় যে টি-২০ ক্ৰিকেটত তেওঁক দেশৰ পৰৱৰ্তী অধিনায়ক হিচাপে দেখাৰ বিশেষ সম্ভাৱনা নাই।
ফিটনেছ হয়তো তেওঁৰ বাবে মূল বাধা। যোৱা ২০২৩ চনৰ বিশ্বকাপত তেওঁ আঘাতপ্ৰাপ্ত হৈছিল। আঠ বছৰীয়া ক্ৰিকেট কেৰিয়াৰত আঘাতৰ বাবে তেওঁ বহু মেচ খেলিব পৰা নাছিল। অৱশ্যে এই বিষয়ত বি চি চি আইৰ ভিতৰত মতানৈক্যৰ সৃষ্টি হৈছে।
লগতে পঢ়কঃ বিপদে লগ এৰা নাই ড’নাল্ড ট্ৰাম্পক; ট্ৰাম্পৰ সভাৰ সমীপত গ্ৰেপ্তাৰ মাস্ক পৰিহিত বন্দুকধাৰী যুৱক
সেই ক্ষেত্ৰত বিকল্প হিচাপে সূৰ্যকুমাৰ যাদৱৰ নাম আহি পৰিছে। বিশ্বকাপৰ ফাইনেলত তেওঁ কাৰ্যতঃ মেচ টাৰ্নিং কেচটো ধৰিছিল। ভাৰতীয় দলটোৰ সন্মুখত আছে শ্ৰীলংকা ভ্ৰমণ। গৌতম গম্ভীৰৰ প্ৰশিক্ষকতাত ভাৰতে তাত তিনিখন টি-২০ আৰু তিনিখন এদিনীয়া খেলিব। ফলস্বৰূপে ক্ৰিকেট মহলেও সেই ছিৰিজত নেতাৰ ভূমিকাত কাক দেখা যায় তালৈ দৃষ্টি ৰাখিছে।