পৃথিৱীৰ একমাত্ৰ উপগ্ৰহ চন্দ্ৰ আজিও বিজ্ঞানীসকলৰ বাবে কৌতুহলৰ উৎস। গৱেষকসকলে নিয়মীয়া পৰ্যবেক্ষণ আৰু অভিযানৰ জৰিয়তে আমাৰ ‘চুবুৰীয়া’ নীলা গ্ৰহটোক অধিক বিশদভাৱে জনাৰ লক্ষ্য লৈছে। এতিয়া ইটালীৰ বিজ্ঞানীৰ এটা দলে দাবী কৰিলে যে তেওঁলোকে চন্দ্ৰৰ মাটিত এটা গুহাৰ সন্ধান পাইছে!
জানিব পৰা মতে, গুহাৰ স্থান চন্দ্ৰৰ ‘শীতল সমুদ্ৰ’ৰ ওচৰত। ১৯৬৯ চনত নীল আৰ্মষ্ট্ৰং আৰু এপ’ল’ ১১ য’ত অৱতৰণ কৰা হৈছিল তাৰ পৰা ২৫০ মাইল দূৰত এই গুহাটো অৱস্থিত। সুদূৰ অতীতৰ লাভা বিস্ফোৰণৰ ফলত ইয়াৰ সৃষ্টি হোৱা বুলি ধাৰণা কৰা হৈছে। ইয়াৰ বহল ১৩০ ফুট আৰু দৈৰ্ঘ্য সম্ভৱতঃ ১০ গজ বা তাতকৈ অধিক।
গুহাটো বিচাৰি উলিওৱা ইটালীৰ ট্ৰেণ্টো বিশ্ববিদ্যালয়ৰ গৱেষকৰ দলটোৰ প্ৰতিনিধি লিঅ’নাৰ্ডো কেৰিয়াৰ আৰু লৰেঞ্জো ব্ৰুজনে কয় যে ‘’চন্দ্ৰৰ গুহাটো ৫০ বছৰতকৈও অধিক সময় ধৰি ৰহস্যৰ আৱৰ্তত ৰৈ আছে। আৰু সেইবাবেই আমি সেইটো পাই আচৰিত হৈছিলো।”
তাৰ লগতে তেওঁলোকে দাবী কৰে যে কেবল এই এটা গুহাই নহয়, তেওঁলোকে নিশ্চিত যে সেই অঞ্চলত আৰু বহুতো গুহা আছে। আনকি, চন্দ্ৰৰ দক্ষিণ মেৰুত এনে এটা গুহাৰ অস্তিত্বৰ বিষয়ে তেওঁলোক নিশ্চিত। বিজ্ঞানীসকলে নাছাৰ লুনাৰ ৰিকনেছান্স অৰ্বিটাৰৰ পৰা ৰাডাৰৰ জোখ-মাখ বিশ্লেষণ কৰিছে।
নাছাৰ সপোন চন্দ্ৰলৈ মানুহ পঠিয়াই তাত উপনিবেশ স্থাপন কৰা। বিশ্বাস কৰা হয় যে প্ৰথম অৱস্থাত এনে গুহা মহাকাশচাৰীৰ আশ্ৰয়স্থল হ’ব পাৰে। ইয়াত থাকিলে মহাজাগতিক ৰশ্মি, সৌৰ বিকিৰণ আৰু সৰু সৰু উল্কাপিণ্ডৰ প্ৰভাৱৰ পৰা ৰক্ষা পৰিব পাৰে।
ভৱিষ্যতে যদি পৃথিৱীখন মানুহৰ বাসস্থানৰ বাবে সম্পূৰ্ণ অনুপযোগী হয়, তেন্তে চন্দ্ৰ মানুহৰ ‘নতুন ঘৰ’ হ’ব পাৰে। সেয়েহে বিজ্ঞানীসকলে এই উপগ্ৰহটোক ভালদৰে জানিবলৈ নিয়মিতভাৱে পৰ্যবেক্ষণ কৰি আহিছে। এইবাৰ তেওঁলোকৰ চকু পৰিল এই গুহাটোৰ ওপৰত, যিটোক সংশ্লিষ্ট বিজ্ঞানীমহলে এক উল্লেখযোগ্য আৱিষ্কাৰ বুলিয়েই গণ্য কৰে।
