অসাৱধানতাবশতঃ আন্তঃৰাষ্ট্ৰীয় সীমান্ত অতিক্ৰম কৰি বাংলাদেশত প্ৰৱেশ কৰা ভাৰতীয় সীমান্ত সুৰক্ষা বাহিনী (বিএছএফ)ৰ এজন জোৱানক আটক কৰিছিল বাংলাদেশৰ সীমান্তৰক্ষী বাহিনী ব’ৰ্ডাৰ গাৰ্ড বাংলাদেশে (বিজিবি)। মঙলবাৰে দুপৰীয়া মেঘালয় সীমান্তত সংঘটিত হয় এই ঘটনা। অৱশ্যে ঘটনাৰ পাছতে দুয়োখন দেশৰ সীমান্তৰক্ষী বাহিনীৰ শীৰ্ষ বিষয়াসকলৰ মাজত যোগাযোগ আৰু বৈঠক অনুষ্ঠিত হোৱাৰ পাছত সন্ধিয়াৰ ভাগত নিৰাপদে ভাৰতলৈ উভতি আহে জোৱানজন।
চৰকাৰী সূত্ৰ অনুসৰি, আটক হোৱা বিএছএফ জোৱানজন কনিষ্টবল পদৰ। আন এক সূত্ৰই তেওঁ হেড কনিষ্টবল বুলি উল্লেখ কৰিছে। মেঘালয়ৰ জোৱাই অঞ্চলৰ বিপৰীত দিশত বাংলাদেশৰ ছিলেট জিলাৰ বিছনাকান্দি সীমান্ত অৱস্থিত। মঙলবাৰে এই অঞ্চলতে সংঘটিত হয় ঘটনাটো। উল্লেখ্য যে এই অঞ্চলত কাঁইটীয়া তাঁৰৰ বেৰ নাই। পৰ্যটকৰ মাজত জনপ্ৰিয় এই স্থানলৈ ভাৰত আৰু বাংলাদেশৰ পৰা নিয়মীয়াকৈ লোকৰ অহা-যোৱা হয়।
এগৰাকী বিষয়াই জানিবলৈ দিয়া মতে, কাঁইটীয়া তাঁৰৰ বেৰ নথকাৰ বাবে অসাৱধানতাবশতঃ বিছনাকান্দি সীমান্ত পাৰ হৈ বাংলাদেশৰ ভূখণ্ডত প্ৰৱেশ কৰে অস্ত্ৰধাৰী বিএছএফ জোৱানজন। সেই সময়তে স্থানীয় লোকসকলে তেওঁক আটক কৰি বিজিবিৰ হাতত গতাই দিয়ে। সূত্ৰ অনুসৰি, স্থানীয় একাংশ লোকে জোৱানজনৰ সৈতে দুৰ্ব্যৱহাৰ কৰাৰ লগতে তেওঁক মুকলি কৰি দিবলৈও অস্বীকাৰ কৰিছিল।
ইফালে, ঘটনাৰ পাছতে সামাজিক মাধ্যমত বিয়পি পৰে কেইবাটাও ভিডিঅ’। ভিডিঅ’সমূহত দেখা গৈছে, একাংশ বাংলাদেশী লোকৰ মাজত আৱদ্ধ হৈ আছে ভাৰতীয় জোৱানজন। দুজন বিজিবি জোৱানে তেওঁক লগত লৈ গৈছে। জোৱানজনৰ হাতত আছিল এটা ৱাকী-টকী আৰু কান্ধত ওলোমাই থোৱা আছিল এটা ইনছাছ ৰাইফল আৰু এটা পাম্প-একশ্যন গান। আন এটা দৃশ্যত স্থানীয় এজন লোকৰ মটৰচাইকেলত বহুৱাই বিজিবিৰ জোৱানসকলে তেওঁক লৈ যোৱা দেখা গৈছে।
জোৱানজন আটক হোৱাৰ খবৰ লাভ কৰাৰ পাছতে তৎপৰ হৈ পৰে মেঘালয় ছেক্টৰৰ বিএছএফৰ শীৰ্ষ বিষয়াসকল। তেওঁক উদ্ধাৰ কৰি ভাৰতলৈ ঘূৰাই অনাৰ বাবে বিজিবিৰ সমপৰ্যায়ৰ বিষয়াসকলৰ সৈতে তাৎক্ষণিকভাৱে যোগাযোগ কৰা হয়। লগতে অনুষ্ঠিত কৰাৰ বাবে অনুৰোধ জনোৱা হয় পতাকা বৈঠক। দুয়োখন দেশৰ সীমান্তৰক্ষী বাহিনীৰ বিষয়াসকলৰ মাজত আলোচনা অনুষ্ঠিত হোৱাৰ পাছত বিজিবিয়ে জোৱানজনক মুকলি কৰি দিয়ে। অৱশেষত মঙলবাৰে সন্ধিয়াৰ ভাগত নিৰাপদে ভাৰতলৈ উভতি আহে তেওঁ। দেশলৈ উভতি অহাৰ পাছত নিয়ম অনুসৰি জোৱানজনৰ স্বাস্থ্য পৰীক্ষাৰ ব্যৱস্থা কৰা হয়।
উল্লেখ্য যে ভাৰত আৰু বাংলাদেশৰ মাজত থকা ৪,০৯৬ কিলোমিটাৰ দৈৰ্ঘ্যৰ আন্তঃৰাষ্ট্ৰীয় সীমান্তৰ নিৰাপত্তাৰ দায়িত্বত আছে বিএছএফ। ইয়াৰ ভিতৰত মেঘালয়ৰ সৈতে বাংলাদেশৰ প্ৰায় ৪৪৩ কিলোমিটাৰ সীমান্ত আছে। এই সীমান্তৰ প্ৰায় ৪০ কিলোমিটাৰ অংশত এতিয়াও কাঁইটীয়া তাঁৰৰ বেৰ নিৰ্মাণ কৰা হোৱা নাই। এনে বেৰৰ অভাৱ থকা সীমান্ত অঞ্চলতে অসাৱধানতাবশতঃ ভাৰতীয় জোৱানজন বাংলাদেশত প্ৰৱেশ কৰাত এই ঘটনাৰ সৃষ্টি হয়।





