আইপিএলত মহেন্দ্ৰ সিং ধোনীৰ খেলুৱৈ জীৱনৰ যেন সামৰণি পৰিল। খেলপথাৰত বেটিং কৰি প্ৰতিপক্ষক ধৰাশায়ী কৰা সেই চিনাকি ধোনীক এতিয়াৰে পৰা আৰু হালধীয়া জাৰ্ছিত দেখা নাযাব। ২০২৭ চনৰ আইপিএলৰ পৰা চেন্নাই ছুপাৰ কিংছৰ পৰামৰ্শদাতা হিচাপে নতুন ভূমিকা গ্ৰহণ কৰিব ভাৰতীয় ক্ৰিকেটৰ প্ৰাক্তন অধিনায়কগৰাকীয়ে। মঙলবাৰে খেলুৱৈ ধৰি ৰখাৰ অন্তিম দিনটোতে এই ঘোষণা কৰে চেন্নাইৰ কৰ্তৃপক্ষই। খেলুৱৈ হিচাপে অৱসৰ ল’লেও দলৰ সৈতে ধোনীৰ সম্পৰ্ক অব্যাহত থাকিব। খেলপথাৰৰ বাহিৰত থাকি দলৰ নতুন প্ৰজন্মৰ খেলুৱৈসকলক দিহা-পৰামৰ্শ আগবঢ়াব তেওঁ।
২০০৮ চনৰ পৰা আৰম্ভ হৈছিল ধোনী আৰু চেন্নাই ছুপাৰ কিংছৰ এই দীঘলীয়া যাত্ৰা। প্ৰায় দুটা দশকৰ এই সম্পৰ্কত ধোনীৰ নেতৃত্বত পাঁচবাৰকৈ আইপিএলৰ খিতাপ আৰু দুবাৰ চেম্পিয়নছ লীগ টি-২০ৰ খিতাপ জয় কৰিবলৈ সক্ষম হৈছিল চেন্নায়ে। দলটোৰ সফলতাৰ ইতিহাসত ধোনীৰ অৱদান সদায় স্মৰণীয় হৈ থাকিব।
প্ৰিয় খেলুৱৈগৰাকীৰ খেলুৱৈ জীৱনৰ সামৰণিত আৱেগিক হৈ পৰিছে চেন্নাই ছুপাৰ কিংছৰ স্বত্বাধিকাৰী এন শ্ৰীনিবাসন। তেওঁৰ ভাষ্য অনুসৰি, ধোনীক বাদ দি চেন্নাই ছুপাৰ কিংছৰ অস্তিত্বৰ কথা কল্পনা কৰাই কঠিন। বিগত দুটা দশক ধৰি তেওঁলোক একেলগে আগবাঢ়িছে। সফলতা আৰু বিফলতা—দুয়োটা সময়তে পৰস্পৰৰ কাষত থিয় দিছে। এই সম্পৰ্ক ইমান দৃঢ় হোৱাৰ মূল কাৰণ হৈছে, তেওঁলোকে কেতিয়াও এজনে আনজনৰ উদ্দেশ্যক লৈ সন্দেহ কৰা নাই।
২০০৮ চনৰ খেলুৱৈ নিলামৰ স্মৃতি সুঁৱৰি শ্ৰীনিবাসনে কয় যে ধোনীক দলত অন্তৰ্ভুক্ত কৰাৰ বাবে তেওঁ নিজেই বিশেষভাৱে জোৰ দিছিল। সেয়া তেওঁৰ জীৱনৰ অন্যতম শ্ৰেষ্ঠ সিদ্ধান্ত আছিল। ধোনীৰ প্ৰকৃত কৃতিত্ব কেৱল জয় কৰা খিতাপৰ সংখ্যাত সীমাবদ্ধ নহয়, বৰং ব্যক্তি হিচাপে তেওঁ কিমান মহান, সেয়াহে আটাইতকৈ গুৰুত্বপূৰ্ণ।
জন্মস্থান ৰাঁচী হ’লেও চেন্নাইৰ মানুহে ধোনীক নিজৰ ঘৰৰ সন্তানৰ দৰেই আঁকোৱালি লৈছে। চেন্নাই ছুপাৰ কিংছৰ পৰিচালন সঞ্চালক কাশী বিশ্বনাথনে কয় যে ক্ৰিকেটাৰ হিচাপে ধোনীৰ কৃতিত্ব প্ৰতিগৰাকী অনুৰাগীৰ মনত চিৰদিন অক্ষুণ্ণ থাকিব। কিন্তু ধোনীৰ আটাইতকৈ ডাঙৰ কৃতিত্ব হ’ল তেওঁ কেনেদৰে চেন্নাইৰ অবিচ্ছেদ্য অংশ হৈ পৰিল। চহৰখনৰ মানুহে তেওঁক নিজৰ ঘৰৰ ল’ৰাৰ দৰেই আদৰি লৈছে।
হালধীয়া জাৰ্ছিত ধোনীক আৰু খেলপথাৰত দেখা নাপোৱাৰ দুখ থাকিলেও নতুন ভূমিকাত তেওঁক দলৰ সৈতে পাই সন্তুষ্টি প্ৰকাশ কৰিছে বিশ্বনাথনে। তেওঁৰ মতে, পিছলৈ ঘূৰি চালে কেৱল জয় কৰা খিতাপসমূহেই নহয়, সেই খিতাপ জয়ৰ আঁৰৰ যুঁজ আৰু পৰিশ্ৰমৰ কথাও মনলৈ আহিব। সেয়াই ধোনীৰ প্ৰকৃত উত্তৰাধিকাৰ। খেলপথাৰত ধোনীৰ অনুপস্থিতি অনুৰাগীসকলে অনুভৱ কৰিব যদিও দলৰ যুৱ খেলুৱৈসকলক তেওঁ পথ দেখুৱাব বুলি আশা প্ৰকাশ কৰে বিশ্বনাথনে। খেলুৱৈ হিচাপে নতুন অধ্যায়ৰ সামৰণি পৰিলেও চেন্নাই ছুপাৰ কিংছৰ সৈতে ধোনীৰ সম্পৰ্ক যে এতিয়াও বহু দূৰ আগুৱাব, সেয়া স্পষ্ট।





