ট্ৰাম্পৰ অতি ঘনিষ্ঠ চাৰ্জিঅ’ গ’ৰৰ দিল্লী আগমন: ভাৰত-আমেৰিকাৰ বাণিজ্য যুদ্ধৰ মাজতে বিশেষ কূটনৈতিক তৎপৰতা

ভাৰত আৰু আমেৰিকাৰ মাজত সৃষ্টি হোৱা কূটনৈতিক আৰু বাণিজ্যিক সংঘাতৰ মাজতে ড’নাল্ড ট্ৰাম্পৰ অতি ঘনিষ্ঠ তথা নৱনিযুক্ত আমেৰিকাৰ ৰাষ্ট্ৰদূত চাৰ্জিঅ’ গ’ৰে নতুন দিল্লীত উপস্থিত হৈছে। শুকুৰবাৰে নিশা দিল্লীত উপস্থিত হৈ গ’ৰে ছ’চিয়েল মিডিয়াত ভাৰতলৈ আহিবলৈ পাই উৎসাহিত বুলি প্ৰকাশ কৰে। তেওঁ উল্লেখ কৰে যে দুয়োখন দেশৰ বাবে আগন্তুক সময়ত বহুখিনি সুযোগ আছে। অৱশ্যে তেওঁ এনে এক সময়ত ভাৰতত ভৰি দিছে, যেতিয়া বাণিজ্য আৰু শুল্কক লৈ দুয়োখন দেশৰ মাজত যথেষ্ট মতানৈক্য চলি আছে। বিশেষকৈ আমেৰিকাৰ বাণিজ্য সচিব হাৱাৰ্ড লুটনিকে শেহতীয়াকৈ কৰা এটা মন্তব্যই পৰিস্থিতি অধিক জটিল কৰি তুলিছে। লুটনিকৰ দাবী আছিল যে প্ৰধানমন্ত্ৰী নৰেন্দ্ৰ মোদীয়ে ট্ৰাম্পক ফোন নকৰাৰ বাবেই যোৱা বছৰৰ এক গুৰুত্বপূৰ্ণ বাণিজ্যিক চুক্তি স্থবিৰ হৈ পৰিছিল। ভাৰতে অৱশ্যে এই দাবী খাৰিজ কৰি ইয়াক ভুল বুলি অভিহিত কৰিছে।

চাৰ্জিঅ’ গ’ৰৰ এই ভ্ৰমণৰ গুৰুত্ব এইবাবেই অধিক কাৰণ ট্ৰাম্প প্রশাসনে ইতিমধ্যে ভাৰতীয় সামগ্ৰীৰ ওপৰত শুল্ক ৫০ শতাংশলৈ বৃদ্ধি কৰাৰ দৰে কঠোৰ সিদ্ধান্ত লৈছে। ইয়াৰ উপৰিও ভাৰতে ৰাছিয়াৰ পৰা খাৰুৱা তেল ক্ৰয় কৰি থকাৰ বাবে ২৫ শতাংশ অতিৰিক্ত শুল্ক জাপি দিয়াৰ লগতে অনুপ্ৰৱেশ আৰু ভিছা নিয়মৰ পৰিৱৰ্তনক লৈও দুই দেশৰ মাজত শীতল যুদ্ধ চলিছে। ট্ৰাম্পে গ’ৰক এজন বিশ্বাসযোগ্য ব্যক্তি হিচাপে গণ্য কৰে আৰু তেওঁক ভাৰতৰ দৰে এক গুৰুত্বপূৰ্ণ কৌশলগত অংশীদাৰৰ সৈতে সম্পৰ্ক অধিক সুদৃঢ় কৰাৰ দায়িত্ব অৰ্পণ কৰিছে। গ’ৰে ২০২৪ চনৰ ট্ৰাম্পৰ নিৰ্বাচনী প্ৰচাৰতো এক গুৰুত্বপূৰ্ণ ভূমিকা পালন কৰিছিল আৰু তেওঁক যোৱা অক্টোবৰ মাহত আমেৰিকাৰ ছিনেটে ৰাষ্ট্ৰদূত হিচাপে অনুমোদন জনাইছিল।

উল্লেখনীয় যে শপত গ্ৰহণৰ পূৰ্বেও অক্টোবৰ মাহত গ’ৰে এবাৰ ভাৰত ভ্ৰমণ কৰি প্ৰধানমন্ত্ৰী মোদী আৰু বৈদেশিক পৰিক্ৰমা মন্ত্ৰী এছ জয়শংকৰক সাক্ষাৎ কৰিছিল। বৰ্তমানৰ এই ভ্ৰমণকালত তেওঁ বাণিজ্যৰ অচলাৱস্থা দূৰ কৰা আৰু কৌশলগত অংশীদাৰিত্বক এক নতুন মাত্ৰা দিয়াৰ চেষ্টা কৰিব বুলি ধাৰণা কৰা হৈছে। ট্ৰাম্পৰ অতি ঘনিষ্ঠ হোৱাৰ বাবে গ’ৰে পোনপটীয়াকৈ হোৱাইট হাউছৰ সৈতে সংযোগ ৰাখি ভাৰতৰ সমস্যাসমূহ সমাধানৰ ক্ষেত্ৰত কেনে ভূমিকা লয়, সেয়া এতিয়া লক্ষ্যণীয় হ’ব।

নেপথ্যত চলি থকা এই বাণিজ্যিক যুদ্ধৰ মাজত গ’ৰৰ উপস্থিতিয়ে নতুন দিল্লী আৰু ৱাশ্বিংটনৰ মাজৰ সম্পৰ্কক এক নতুন দিশ দিব পাৰে নে নাই, তাক লৈ চৰ্চা আৰম্ভ হৈছে। ভাৰতে নিজৰ স্বাৰ্থ সুৰক্ষিত কৰি আমেৰিকাৰ সৈতে কেনেদৰে বুজাপৰালৈ আহে, সেইয়া অনাগত দিনবোৰত স্পষ্ট হ’ব।