ল’কডাউনৰ মাজতে গুৱাহাটীত কেইবা কাৰ্টন কফ চিৰাপৰ সৈতে এজনক আটক

ল’কডাউনৰ মাজতে মহানগৰীৰ হাতীগাঁও লৰ্ড এপাৰ্টমেণ্টত আজি বৃহৎ পৰিমাণৰ নিচাযুক্ত সামগ্ৰী জব্দ কৰা হয়। দিছপুৰ আৰক্ষীৰ অভিযানত জব্দ হোৱা কেইবা কাৰ্টন অবৈধ কফ চিৰাপ চ এছ-০২ এফ-৯৩০৫ নম্বৰৰ এখন হুণ্ডা আই-১০ গাড়ীত ৰখা হৈছিল।

কাৰ্টন ভৰ্তি গাড়ীখনৰ পৰা আৰক্ষীয়ে ১১০০টা কফ চিৰাপৰ বটল জব্দ কৰে। জব্দ কৰা বটলখিনিৰ মূল্য প্ৰায় ১ লাখ টকা হ’ব বুলি আৰক্ষীয়ে জানিবলৈ দিয়ে।

নিচাযুক্ত সামগ্ৰীখিনিৰ সৈতে মেহদি আলম নামৰ এজন ব্যক্তিক আটক কৰা হয়। ধৃত আলমৰ ঘৰ নগাঁও জিলাত।

দিছপুৰ আৰক্ষীৰ এটা সূত্ৰই জনোৱা মতে পশ্চিমবংগৰ পৰা অনা সামগ্ৰীখিনি নগাঁৱত বিক্ৰী কৰিবলৈ নিয়াৰ যো-জা চলাই থকাৰ সময়তে বিশেষ সূত্ৰৰ খবৰৰ ভিত্তিত আৰক্ষীয়ে অভিযান চলাই সামগ্ৰীখিনি জব্দ কৰে।