কৰ’নাত প্ৰাণ হেৰুৱালে বলীউদৰ জনপ্ৰিয় সংগীত পৰিচালক নাদিম-শ্ৰাৱণ যুটীৰ শ্ৰাৱণ ৰাঠোৰে
মাৰাত্মক কৰ’না ভাইৰাছত আক্ৰান্ত হৈ প্ৰাণ হেৰুৱালে বলীউদৰ বিখ্যাত তথা এসময়ৰ অতি জনপ্ৰিয় সংগীত পৰিচালক নাদিম-শ্ৰাৱণ যুটীৰ শ্ৰাৱণ ৰাঠোৰে।
মৃত্যুৰ সময়ত বিশিষ্ট সংগীত পৰিচালকগৰাকীৰ বয়স হৈছিল ৬৭বছৰ। শ্ৰাৱণৰ মৃত্যুত বলীউদত শোকৰ ছাঁ পৰিছে।
কেইদিনমান পূৰ্বে কৰ’নাত আক্ৰান্ত হৈছিল শ্ৰাৱণ ৰাঠোৰ। তেওঁৰ কো-মৰ্বিডিটি আছিল। শাৰীৰিক অৱস্থাৰ অৱনতি ঘটাৰ পাছত তেওঁক মাহিমৰ এছএল ৰাহিজা হাস্পাতলত ভৰ্তি কৰা হৈছিল।
হাস্পাতলত ক্ৰমাৎ স্বাস্থ্যৰ অৱস্থাত সংকটজনক হৈ পৰাত তেওঁক ভেন্টিলেটৰ ছাপোৰ্টত ৰখা হৈছিল। অৱশেষত মৃত্যুৰ সৈতে যুঁজ দি হাৰ মানিলে শ্ৰাৱণ ৰাঠোৰে।
বলীউদৰ বহু জনপ্ৰিয় সংগীতৰ স্ৰষ্টা নাদিম-শ্ৰাৱণ যুটীয়ে এক সুদীৰ্ঘ কাল এক অনন্য সংগীত পৰিচালকৰ যুটী হিচাপে প্ৰতিষ্ঠিত হৈ পৰিছিল।
নাদিম-শ্ৰাৱণ যুটীয়ে সংগীত পৰিচালনা কৰা ছবিৰ তালিকাখন বহু দীঘলীয়া যদিও ইয়াৰে কিছুমান ছবিৰ নাম উল্লেখ কৰিলেই সকলোৰে মনত সেই ‘মেলডি মিউজিক’ৰ স্মৃতি ভাহি উঠিব।
এনে ছবিসমূহৰ তালিকাত আছে-আশিকী, দিল হ্যায় কি মানতা নেহী, চাজন, ফুল ঔৰ কাঁটে, চড়ক, দিল ক্যা কিয়া কচুৰ, দিৱানা, দামিনী, হাম হায় ৰাহি প্যাৰ কে, ৰাঙ, দিলৱালে, বৰসাত, ৰাজা, অগ্নিসাক্ষী, চাজন চলে চসুৰাল,জীত, ৰাজা হিন্দুস্তানী, জুদাই, মোহব্বত, পৰদেশ, আ অব লৌট চলে. ছিৰ্ফ তুম, ধড়কন, কচুৰ, ইয়ে দিল আশিকানা,হা মেইনে ভি প্যাৰ কিয়া হ্যায়,ৰাজ, হাম তুমহাৰে হে চনম, জিনা চিৰ্ফ মেৰে লিয়ে, দিলকা ৰিস্তা, আন্দাজ, কয়ামত আদি।