শিৱসাগৰত ‘মিট দ্যা ডিচি’ কাৰ্যসূচী; কণ কণ ছাত্ৰ-ছাত্ৰীৰ সৈতে উপায়ুক্তৰ মত বিনিময়

শিৱসাগৰ জিলা প্ৰশাসনৰ আন এক প্ৰশংসনীয় কাৰ্যসূচীৰ সোমবাৰে শুভাৰম্ভ কৰা হয়।

জিলাখনৰ কণ কণ  ছাত্ৰ-ছাত্ৰী সকলক প্ৰশাসন যন্ত্ৰৰ কাম কাজ চোৱাৰ আৰু জিলা উপায়ুক্তক নিচেই কাষৰ পৰা লগ পোৱাৰ লগতে তেওঁৰ লগত ছাত্ৰ-ছাত্ৰী সকলে মত বিনিময় কৰিব পৰাকৈ ‘মিট দ্যা ডিচি’ শীৰ্ষক এক বিশেষ কাৰ্যসূচীৰ শুভাৰম্ভ কৰা হয়।

প্ৰতি সোমবাৰে বিয়লি ৪ বজাত এঘন্টাৰ বাবে একোখনকৈ বিদ্যালয়ৰ ছাত্ৰ-ছাত্ৰীয়ে জিলা উপায়ুক্তক সাক্ষাৎ কৰাৰ সুবিধা পাব।

শিৱসাগৰ জিলা উপায়ুক্ত কাৰ্য্যালয়ৰ সভাকক্ষত সোমবাৰে অনুষ্ঠিত এই কাৰ্যসূচীত স্থানীয় লক্ষ্মীনাথ বেজবৰুৱা শিশু ভৱন প্ৰাথমিক বিদ্যালয়ৰ ছাত্ৰ- ছাত্ৰী সকলে অংশগ্ৰহণ কৰে।

উপায়ুক্ত গৰাকীয়ে তেওঁলোকৰ লগত বিভিন্ন-বিষয়ৰ ওপৰত মত-বিনিময় কৰে।

উপায়ুক্তই ছাত্র-ছাত্ৰী সকলক নিষ্ঠাৰে অধ্যয়নত আত্মনিয়োগ কৰি নিজৰ বাবে এক উজ্জ্বল ভৱিষ্যতৰ ভেটি নিৰ্মাণৰ বাবে উৎসাহ যোগায়।

দেশৰ একোগৰাকী সুনাগৰিক হ’বলৈ তেওঁলোকক প্ৰয়োজনীয় গুণসমূহ আয়ত্ব কৰিবলৈ এতিয়াৰে পৰা সচেষ্ট হ’বলৈ উপায়ুক্ত গৰাকীয়ে বিভিন্ন পৰামৰ্শ আগবঢ়ায়।

তেওঁ উপস্থিত শিক্ষক-শিক্ষয়িত্ৰী আৰু অভিভাৱক সকলক ছাত্ৰ-ছাত্ৰী সকলক সদায় সৎ পথত চলাৰ বাবে পথ প্ৰদৰ্শন কৰিবলৈ আহ্বান জনায়।

তেওঁলোকৰ মাজত লুকাই থকা প্ৰতিভা আৰু সম্ভাৱনাক বিকশিত হ’ব পৰাকৈ এক সুস্থ বাতাবৰণ প্রদান কৰিবলৈ সকলোৱে মনোনিবেশ কৰিব লাগিব বুলিও তেওঁ মতপোষণ কৰে।

উপায়ুক্তই অংশগ্ৰহণকাৰী ছাত্ৰ-ছাত্ৰী সকলক পৰিবেশ সংৰক্ষণৰ প্ৰতি সচেতন কৰাৰ লক্ষ্যৰে একোটাকৈ গছ-পুলি উপহাৰ স্বৰূপে প্ৰদান কৰি এই সমূহক আদৰ-সাদৰ কৰি প্রতিপালন কৰিবলৈ আহ্বান জনায়।